【全劇終】《我喺街執咗個失憶嘅女仔返屋企》: 統測篇：各懷鬼胎嘅讀書會（下）

於是我地各自返入房，開始讀書會嘅下半場。
 
一入我房，千惠就好似去咗博物館咁四圍望。
 
佢呢個反應係我預測之內，好彩我間房一向冇咩唔見得光嘅野——
 
比著小悠未嚟之前嘅話。
 
千惠望向地下，隨即一副驚訝表情。
 




Fuck！百密一疏，唔記得地下有小悠個床舖！
 
「點解會有床舖架？」佢問。
 
我即刻飛身撲向地，然後講：「慎防我夜晚瞓教碌落地囉！喺地下set多個床舖係我十幾年嚟嘅習慣。」
 
「有冇咁反瞓呀？」佢半信半疑。
 
「梗係有啦！我成日瞓醒都落咗地下架，哈哈！」配合兩聲浮誇嘅假笑，雖然自己聽落都覺得好假。
 




「係呀？等我今晚驗證吓！」
 
「喂！說好的通頂溫書呢？！」
 
「我先唔信你唔會瞓著～」
 
之後幾個鐘，我地坐咗喺書枱前溫書，千惠好認真咁教我，同我預想中會搞搞震嘅佢完全係兩回事。
 
忽然有啲愧疚，今舖真係自我意識過剩，柒到想搵個萬人坑埋咗自己。
 




唔知阿妹佢地咩情況？
 
幾乎可以肯定阿妹非常在意小悠嘅實力，應該會唔知諗咩方法測試佢。
 
不過佢在意到咁，搞到我都有啲在意。
 
慶幸我張書枱靠牆，而且房間隔音唔算好好，所以細心去聽嘅話應該聽到阿妹房嘅聲。
 
我豎起耳仔，睇吓會唔會聽到啲咩。
 
「呢度呢度，就要咁樣咁樣咁樣solve。」旁邊嘅千惠一直教緊我做數。
 
「嗯嗯、嗯嗯。」我求其應。
 
「你有冇聽緊架？」




 
我回過神：「梗係有啦！要咁樣咁樣咁樣solve吖嘛！」
 
理所當然，咩都聽唔到。
 
呢個時候，千惠企起身：「你自己解吓題先，我去沖涼。」
 
「嗯嗯你去啦。」
 
突然間佢哄埋嚟，我聞到一陣香味：「你唔可以偷睇～」
 
「邊個得閒偷睇…」
 
佢個樣好似有啲唔忿氣咁出咗房。
 




之後，我將精神集中返喺數學題上面，直至聽到阿妹房隱約傳嚟對話聲。
 
不過呢個距離完全聽唔到佢地講咩，所以我將耳仔貼埋牆度。
 
「……」
 
「……」
 
…結果都係咩都聽唔到，淨係好似聽到小悠有講我個名。
 
即係喺度講緊我？
 
唔係講我壞話吓嘩…
 
身後傳嚟開門聲，不過我仍然在意緊對面房咩情況。




 
我嘗試將頭轉向另一邊，用另一隻耳仔去聽，點知一擰轉，就見到千惠喺極近距離之下做緊一樣嘅動作，近到爭少少就會掂到佢。
 
我嚇一跳，後退咗幾步。
 
「你聽緊咩呀？」
 
「…冇呃！隔離房好似有啲怪聲啫。」我急忙搵藉口。
 
佢換咗套睡衣，身上散發嘅香味我認得係阿妹嘅沐浴露。
 
然後佢坐咗喺我張床，問：「點呀？做數做成點？」
 
「嗯，應該冇咩問題。」
 




之後，我有我做數，佢就坐喺我張床玩手機。
 
相隔一陣之後，佢講：「喂，問你啲野？」
 
「咩呀？」
 
然後，佢問咗我一個爆炸性問題：
 
「其實你係咪鍾意小悠？」