【全劇終】《我喺街執咗個失憶嘅女仔返屋企》: 統測篇：各懷鬼胎嘅讀書會（中）

說好的晚餐，最後由我整好四人份量嘅意粉，另加小悠要求嘅魚。
 
「點解佢有魚食嘅？」食嘢嗰陣，千惠問咗個毫無意義嘅問題。
 
「呢個…係佢特別要求。」
 
「嗯，大家要唔要試吓呀？」小悠好努力推介我整俾佢嘅魚。
 
不過呢番好意俾千惠以最憎食魚為由拒絕，而阿妹就象徵式咁夾咗一啖嚟試，最後我都唔執輸食返自己啲手勢。
 




見到千惠停晒手咁，我問：「你係咪唔飽呀？你去廚房睇吓有冇嘢啱食嘞？」
 
「嗯！你想食咩阿帆都會煮俾你架！」小悠呢句同佢嘅晚餐一樣，都係多鳩餘。
 
「真係？乜原來有人煮嘢食咁叻架？」
 
「我冇認過。」
 
「唔係吖，我覺得阿哥你啲廚藝真係進步咗。」
 




「嗯！雖然喺度住咁耐都未食過阿帆煮嘅嘢，不過我覺得好好食。」
 
「你乜都話好食架啦。」
 
呢個時候，千惠突然好大反應：「你喺度住？」
 
睇嚟阿妹冇同佢講過小悠嘅事…
 
我連忙解釋：「係暫住！一搵到地方佢就搬架喇。」
 




「咁點解會搵你屋企暫住？」
 
「因為…」我喺腦海深處摷返個萬年藉口出嚟，不忘俾眼色阿妹：「小悠係我親戚個女，我親戚托我照顧佢。」
 
阿妹似乎明白我意思：「er...係呀，小悠係我地親戚個女。」
 
「咁小悠瞓邊呀？」
 
「我瞓…」趁小悠講落去之前，我喺枱底踢咗佢一腳。
 
「吖，阿帆你做咩踢我呀？」佢皺晒眉講。
 
多得佢呢個弱智反應，成件事變得更難兜。
 
「小悠平時瞓我間房。」阿妹把聲就如天降甘霖一樣，果然阿妹係最優秀嘅。




 
Nice Job。我暗地叫好，如果俾千惠知道小悠同我瞓同一間房，我往後應該有排煩。
 
「原來係咁～」
 
正當我以為件事會就咁平息，千惠又有嘢發表：「我諗到喇！」
 
「你諗到咩呀？」小悠問。
 
「反正我地今晚都要通頂，不如陣間就分兩組入房進行一對一教學！」
 
「喂，唔使喇掛？」我第一時間抗議。
 
「梗係要啦。我頭先觀察咗你同小悠好耐，你地個底真係麻麻地，所以一對一教學係最快都係最有效嘅方法。」
 




「一對一呀？咁即係邊個教邊個呀？」小悠依然天真地問。
 
「我講過啦？因為你地個底差少少嘛，所以我同晴晴一人執一件就啱喇。」千惠面不改容將我同小悠形容到街邊檔50蚊兩件嘅t-shirt一樣。
 
我向阿妹發出求救眼神，期望佢會以神嘅姿態終結呢個亂局，點知佢竟然成為魔鬼嘅一方。
 
「呢個提議幾好，主要針對弱項加強操練，應該可以一晚內見到進步。」
 
雖然阿妹好認真替我地著想，但佢應該唔知提出呢個建議嘅人一定唔係咁諗…。
 
咪住先，佢唔係因為執著小悠嘅實力，所以先贊成一對一教學掛…？
 
說時遲那時快，千惠已經唔知喺邊度準備咗兩支鉛筆：「呢度兩支筆，抽到長啲嗰個就同晴晴一組。」
 
「阿帆，我地快啲抽啦！」小悠捉住我隻手，我地各自揀咗一支筆。




 
「…我係咪唔可以反對架喇。」我嘅疑問好明顯得唔到任何回應。
 
「咪住，」呢個時候阿妹突然出聲，我地三個齊齊望住佢：
 
「唔使抽簽，我就同小悠一組。」
 
阿妹呢句令我肯定我冇估錯。
 
「太好喇，咁我同高田帆一組！」
 
「哈哈，而家呢個組合同宿營嗰陣嘅野外定向一模一樣。」小悠發出不合時宜嘅笑聲。
 
就係咁先煩！
 




「放心，你有咩唔識我都會教你架。」千惠偷偷向我展示勝利嘅微笑，我好難相信佢唔係另有目的…
 
讀書會嘅下半場，就係咁於一片混亂中展開。