【全劇終】《我喺街執咗個失憶嘅女仔返屋企》: 統測篇：各懷鬼胎嘅讀書會（上）

讀書會開始咗廿分鐘，我先發覺情況係有幾咁不妙。
 
簡單說明一下，嗰張俾我地當做臨時溫習枱嘅飯枱，啱啱好俾我地四個人坐滿：千惠坐喺我對面，小悠同阿妹就分別坐我側邊。
 
平時對住阿妹同小悠都唔覺，不過加埋千惠之後，我先意識到而家係男女完全失衡嘅局面。
 
我居然在意得我一個男嘅…
 
再咁落去真係唔使旨意溫到書，所以我偷偷sd訊息俾張廷宇，諗住叫佢嚟戥一戥腳，點知個死仔秒速拒絕，話芝芝牙痛要陪佢睇醫生 。
 




真係頂佢個肺。
 
唔緊要，我仲有許正峰。
 
「阿雪嚟我咪嚟囉！」佢咁樣覆我。
 
「你…！」我忍住掟電話嘅衝動。
 
先唔講駱以雪肯唔肯上嚟，就算佢真係肯，都只會令到而家嘅局勢變得更混亂。
 




所以，我決定君子不憂不懼。（溫緊中文學人拋吓書包，哈）
 
阿妹好體貼地將今日嘅讀書會劃分做四part，分別溫四個主科，但依我所見，在座各位都唔似認真溫緊書。
 
例如坐我對面嘅女仔，每隔幾十秒就望住我陰陰嘴笑，唔知笑乜。
 
而坐我隔離嘅小悠，對眼雖然望住篇魚我所欲也，但佢輕輕抖動嘅嘴唇同埋吞口水嘅動作話俾我聽，佢個腦唔係諗緊孟子。
 
睇嚟佢已經解鎖一項新技能，就係望住個字都聯想到嗰樣嘢嘅味道。
 




但我最唔估唔到嘅係，連全世界最乖、最優秀、品行最端正嘅阿妹，而家副心機都唔似喺本書上面。
 
理由係佢嗰種不時投向小悠嘅目光，仲要係帶啲懷疑嗰隻。
 
我冇估錯，阿妹果然好在意小悠嘅實力。
 
雖然我好想同阿妹講，坐佢對面嘅只係個望住文言文都FF自己食緊魚嘅白痴…
 
點都好，我要打破呢個咁頹廢嘅局面。
 
「不如搵人講啲嘢啦。」
 
「阿帆！我諗到今晚想食咩！」小悠好畀面，做第一個回應。
 
魚吖嘛…知喇…




 
「係喎，我地今晚食咩呀？」對面千惠問。
 
「我地啱啱去超市買咗啲嘢食，諗住喺屋企煮。」阿妹解答。
 
「好呀！高田帆你悶唔悶呀？」
 
「…想點呀？」
 
「玩啲好玩嘅嘢囉。」
 
「點呀點呀！係咩呀？」小悠雙眼發光。
 
「我地互相問書，答錯最多嗰個今晚負責煮飯！」
 




「好呀！！！」仲咁大聲，呢個小悠究竟知唔知對面嗰兩個係區內傳統名校嘅學生…
 
「好似幾好玩，希望阿哥你唔使負責煮飯啦。」居然連阿妹都…
 
「…我冇話贊成，不過你地都係人多蝦人少架啦。」
 
「第一題，高田帆你答！」
 
「喂喂！俾我揭返開本書先！」
 
結果唔難想像，面對傳統名校嘅輾壓，孤軍作戰嘅我華麗地成為今晚嗰餐嘅主理人。