【全劇終】《我喺街執咗個失憶嘅女仔返屋企》: 統測篇：和解

「我地今日就講到呢度，你有冇唔明呀？」許正峰問。
 
我擰頭：「你教得好過學校老師多多聲，不如以後我叫你許sir算啦？」
 
「嘩，咁我又受唔起。」
 
我望向隔離，駱以雪嗰邊都完咗，兩個form1喺度執緊嘢，但都唔夠駱以雪快：「你地有嘢唔明就再問我啦，我走先。」
 
「bye bye ！」兩個form1好乖咁講。
 




許正峰見到駱以雪走人，即刻跟埋上去：「雪！」
 
因為坐正門口隔離，佢地嘅對話我聽得好清楚。
 
「你做咩唔等我呀？我好快執完嘢架喇。」
 
「我都教完我負責嗰兩個中一生，點解唔可以自己走先？」
 
「咁我地順路吖嘛！」
 




「明明我地又唔係住同一區，都唔知點解你要話順路。」
 
「就算唔順路，都可以一齊返屋企啫？我請你食雪糕吖？」
 
「唔使喇，我趕時間。」
 
「雪…！」
 
消化完上述對話，我確定咗兩樣嘢：第一係我喺隔離都聽得出，許正峰擺明鍾意駱以雪，仲要超級明戀嗰隻，第二就係駱以雪對任何人講嘢都係咁堀。
 




雖然知嚟冇咩用，不過當係學生會八掛嘢咁睇啫，仲有，我衷心祝福許正峰會追到駱以雪，因為聽講有拖拍嘅女性會冇咁暴力，咁對全校同學（以及我）嚟講應該係一件天大喜訊。
 
總之，加油啦。
 
「你唔使理我架喎，你應該追住駱以雪。」我對行返入嚟嘅許正峰講。
 
「唔得架，我唔想迫到佢反感，而家咁就好。」然後佢問：「你執完書包未？一齊行啦。」
 
落緊樓梯嗰陣，我忍唔住問：「點解你幫我補習？你唔係好憎我架咩？」我諗起體育館嗰次。(見35. 放學後嘅體育館)
 
「我唔係針對你，只不過係針對嗰啲蝦阿雪嘅人啫。」佢解釋：「體育館嗰次你激到阿雪掉轉頭走，我咪借啲意凶你幾句囉。」
 
「咁你今日又幫我？」
 
「頭先阿雪話你幫咗佢，咁我幫返你都好正常吖。」許正峰拍拍我膊頭。




 
經過今日之後，我對許正峰呢個人真係180度改觀，撇除駱以雪呢塊逆麟，話唔定佢係學生會入面最正常、最親切嗰個。
 
「其實體育館嗰次，我都有唔啱嘅。」我猶疑咗一陣，然後講。
 
「咁梗係啦！你點止唔啱，仲係好撚錯…不過算啦，由而家起我當你係fd。」
 
我發自內心地笑：「咁我聽日繼續搵你補習喇。」
 
「冇問題吖。」
 
之後我地好有默契地碰咗一吓拳。
 
（雖然咁講好作狀）所謂嘅青春，可能就係由名為「衝突」同「和解」嘅一塊塊碎片組成。
 




「諗諗吓都係唔可以算，你知唔知約到阿雪打排球係一件幾咁難得嘅事？結果我連佢對波…佢啲球技都未欣賞夠，佢就俾你激走咗…你知唔知我日思夜想咗幾耐？我講緊我對阿雪嗰對…嗰啲出色球技…」許正峰突然一面悔恨，眼角好似仲有兩滴眼淚。
 
「來日方長，你咪以後再約過囉。」
 
「唔得！！！我決定聽日即刻約！！！今次一定要欣賞到波濤淘湧嘅畫面！！！」
 
...佢有意無意咁將真正目的爆響口，連改口都廢事。
 
「喂，一於預埋你，嚟個三人排球戰。」
 
「我嘅話，都係等統測完埋先好啲…」
 
咳，更正。所謂嘅青春，除咗衝突同和解之外，更多嘅應該係對於女生嘅幻想。