【全劇終】《我喺街執咗個失憶嘅女仔返屋企》: 統測篇：集思廣益（下）

上樓途中，許正峰同我講學生會準備搞個學長學妹計劃，內容係搵啲高form帶住啲低form進行一系列活動，課後補課就係其中一個環節。
 
「呢個學長學妹計劃係我走之前搞嘅，嚟緊雖然我唔再係學生會，不過會照樣負責呢個計劃。」
 
「原來係咁，但同我想攞好成績有咩關係？」
 
「今日我地試行課後補課環節，原則上就一對一嘅，見你咁想考好個統測就益吓你啦。」
 
「你意思係你同駱以雪做學長，我做學妹呀？」
 




「我地會針對式咁講解統測重點，聽完包你唔使溫都合格有餘。」
 
「…真係唔使溫？」
 
「統測考嘅嘢本來就好片面，只要記住上堂講嘅嘢就得，當然如果你話想喺大考入面有好成績，我另外仲有幾套方法嘅。」聽完佢講，我不禁懷疑佢屋企係咪開補習社。
 
「咁我跟你去試吓囉，但我可唔可以問多一樣？」
 
「嗯？」
 




「點解要叫學長學妹計劃，而唔係叫其他呢？」呢個名聽起嚟硬係有種學習以外嘅意味…
 
「關於呢一點我都考慮咗好耐，應該叫學長學妹計劃定係叫學姊學弟計劃好，最後按我地高form男仔多啲呢個理據，就揀咗學長學妹計劃呢個名。」
 
原來係佢改嘅，咁我冇嘢問喇。至於呢個計劃名究竟係用嚟滿足佢奇怪欲望抑或真係基於性別而去劃分，我應該無從得知，之但係都阻止唔到我懷疑佢係學妹控嘅事實。
 
「我地到喇。」佢帶我到5樓嘅溫習房前。
 
裏面傳嚟駱以雪把聲：「今日有咩功課呀？你地攞晒出嚟先？」而且，比平時溫柔十倍。
 




我地行入去，見到駱以雪照顧緊兩個一睇就知係form1嘅一男一女。
 
「Hi，又見面喇我地。」
 
駱以雪無視我嘅招呼，一副問許正峰點解會帶埋我嚟嘅眼神。
 
「我搵埋佢嚟，順便可以試吓水溫，睇吓同級教返同級work唔work…阿雪你唔使理我地架喇，兩位學弟學妹就交俾你。」
 
駱以雪依然不滿：「難得嘅補課時間，我唔想有啲無謂人喺隔離嘈住。」
 
「冇辦法喇，班房又淨係book咗一個，我地想去第二度都唔得，最多我地講嘢細聲啲、溫柔啲。」
 
「嗯，就好似頭先你同兩個低form同學講嘢咁溫柔。」我強調溫柔兩個字。
 
駱以雪應該係想鬧我，但當住兩個低form面前又唔好意思破壞自己形象，只可以將啖氣吞返落肚。




 
雖然見佢嬲到騰騰震個樣幾好笑，但再玩落去，補完課之後我唔知會受到咩對待，所以我都係乖乖地跟許正峰坐喺班房另一邊。
 
之後嘅粒半鐘，許正峰將統測嘅重點全數對我講咗一次；而相隔幾行，就係駱以雪（溫柔版）教導兩個form1嘅情境。