【全劇終】《我喺街執咗個失憶嘅女仔返屋企》: 統測篇：意外畫面（上）

臨走前，我問許正峰關於學生會補選嘅事。
 
「你收唔收到風，學生會補選有咩人參加？」
 
「照舊學生會內部會有推薦人選，另外都會有老師推薦名額，你問嚟做咩？」
 
「冇，我想睇吓自己有冇機會走得甩啫…」
 
許正峰思考一陣：「好難講，你有份去宿營，會長佢地好大機會推薦你。」
 




「就係咁先死…我已經夠多嘢煩…」
 
「燒到埋嚟先算啦，況且叫你選啫，求其作個政綱出嚟hea咪得囉。」
 
「你講得啱。」
 
「咁我走喇，bye。」
 
同許正峰道別完，我就返咗屋企。之後嘅日子，我放學都去咗搵佢補習，而小悠貌似亦為統測努力中，就係咁過咗幾日。
 




星期四嘅放學。
 
踏出校門一刻，手臂突然俾人捉住咗。
 
「高田帆！」
 
雖然未擰轉面，不過聽把聲都知係邊個。
 
「…你喺度嘅？」
 




千惠著住校服，孭住個側孭書包。
 
「人地特登嚟等你架！」
 
呢個時間，差唔多全校一齊湧出校門，經過嗰陣都對我地眼望望。
 
 我拿拿聲拉佢埋花槽後面：
 
「等我做咩呀？今日又唔使幫阿妹整電腦。」
 
「一定要整電腦先可以等你架咩？」
 
「咁咩事要勞煩你特登行兩個街口過嚟？」
 
佢嘻嘻笑：「嚟約你去街囉～」




 
「去街？去咩街呀？」
 
「去到你咪知囉。」講完佢拖起我隻手行，不過我隻腳好似黐咗膠水咁黏住地下。
 
佢回頭望住我：「仲唔行？」
 
「等陣先！」我答佢，目光一直望住學校門口嗰邊。
 
因為幾十秒之前，我見到珀奈同個讀緊中六、出名鍾意玩女嘅校草一齊由校門出嚟。
 
佢地停喺校門附近唔知講緊乜嘢，講兩講之後一個衝擊畫面出現了。
 
珀奈趷高腳，錫咗個校草塊面一吓。
 




睇到呢幕嘅我成個人定格咗。
 
「嗰邊有咩好望呀？」
 
明明…上次天台個氣氛咁好。
 
「喂！你應吓機啦！」
 
我仲以為送咗包朱古力俾佢，佢又咁鐘意，即係代表我有機。
 
點知而家又俾我見到啲咁嘅畫面。
 
定係珀奈太單純，俾個專食女嘅校草呃緊自己唔知？
 
呢個時候，千惠想拉我出去。




 
「喂，去邊呀？」
 
「見你望得咁投入，應該識架啦？同你出去打招呼。」
 
「邊、邊個話我識佢地啫？」我拉佢返嚟。
 
「唔識你又望到呆晒？」
 
「…咁見到啲咁衝擊嘅畫面想食吓花生唔得架咩？我爭在未攞電話影低咋。」我求其搵藉口。