【全劇終】《我喺街執咗個失憶嘅女仔返屋企》: 統測篇：集思廣益（中）

見佢來勢洶洶，我即刻放開手，駱以雪乘機走咗去。
 
許正峰衝過嚟，準備一拳中向我：「你想對阿雪做咩呀？」
 
但成功之前，已經俾駱以雪制止咗：「你係咪想再俾人停學呀？」
 
「停飽佢囉！反正我連學生會都冇得做啦！」
 
「如果你再停學，下年留班都有你份呀！」
 




駱以雪講完，許正峰冇聲出。
 
「…佢頭先有冇對你做咩？」冇幾耐，佢細聲問駱以雪。
 
「冇，佢只係唔想我俾啲籠車撞到。」
 
我有啲驚訝駱以雪會咁講，雖然呢個係事實。
 
「對唔住。」令我更驚訝嘅係許正峰居然同我道歉。
 




我見氣氛開始緩和，就笑笑口講：「許正峰你嚟埋就啱喇，其實呢就咁嘅，我嚟搵駱以雪係有啲嘢想問嘅，不過而家你喺度，你可能更加幫到我…」
 
「你要問咩我解答你，你唔好搞阿雪。」
 
我差啲俾佢呢句型親。
 
「係咁嘅，我想請教吓兩位，點樣可以令成績突飛猛進。」
 
「吓？咪溫書囉。」許正峰二話不說咁講。
 




「我指除咗溫書之外。我要快靚正咁喺統測考個好成績。」
 
「我係咪聽緊笑話？你學人發奮讀書？」駱以雪搭嗲。
 
「如果有唔使發奮又有好成績嘅方法，我梗係無任歡迎啦…」
 
「咁呀？我建議你去偷試卷，然後祝你失敗直接俾人踢出校。」
 
「放心，到時我一定會話係你指使我嘅。」
 
「快靚正呀？唔係冇嘅。」許正峰一面認真咁幫我諗，有啲令我出乎意料。
 
「差唔多夠鐘喇，我上去等你。」駱以雪講完之後睥向我：「本來諗住落嚟買野飲，點知俾你浪費晒我啲時間。」
 
「哈哈。」我假笑兩聲。




 
駱以雪上樓之後，我問：「你地今日有嘢做？咁你上去先啦，我大日再嚟搵你？」
 
「我諗到嘞，唔知夠唔夠快靚正，不過可以試吓。」
 
「係？」我喜出望外。
 
「跟我嚟啦，我一路解釋你聽。」