【全劇終】《我喺街執咗個失憶嘅女仔返屋企》: 統測篇：集思廣益（上）

放學之後，我嚟到5C班房，目標係我地嘅年級第三名。
 
不過睇嚟唔使我行入去，佢已經自動踏出咗班房。
 
「喂，駱以雪！」我拿拿聲叫住佢。
 
佢睥我一眼，然後掂行掂過。
 
「我有啲嘢想請教吓你呀！」我跟上去。
 




佢一路落樓梯，似乎冇諗過理我。
 
落到差唔到地下，佢突然轉身：「跟完未呀！偷窺狂！」
 
我剎唔切制，差啲成個撲上去，好彩最後一秒拎返個平衡。
 
「…乜你仲未放棄嗰個稱呼？」
 
「點解要放棄？你係偷窺狂係事實，而且今日之後要加多一個：跟蹤狂。」
 




「我嚟搵你真係有嘢想問架。」
 
「我冇嘢想答喎。」佢繼續行。
 
「…仲以為去完宿營我地關係更進一步添。」
 
佢一手扯我衫領：「你注意吓你啲用詞呀！」
 
「得得得…」我舉手投降：「我係指，我地之間都叫有計傾吖…」
 




「邊個同跟蹤狂有計傾？況且你要傾計咪搵隔離女校啲人囉。」睇嚟佢仲記住上次千惠sd俾我嗰張食雪條相。
 
「上次嗰張相…算啦，我冇必要解釋，你又唔係我邊個。」
 
「我頭先嗰句唔係想表示啲咩！只係想講你係一個徹底徹尾嘅變態偷窺跟蹤狂！你唔好喺度自我意識過剩呀！」隨住駱以雪嘅激動升級，我嘅稱呼都融合成為一個新嘅境界。
 
「我又冇話你想表示啲咩，你無啦啦自爆做乜啫？」
 
「我…」
 
呢個時候有幾個工友推住籠車經過：「同學仔！唔該借借！」
 
我將駱以雪推埋牆邊，並且巧妙地預留空位喺我地之間，既可以騰出空間俾工友，又不至於令我地身體完全貼近。
 
不過，心口嗰兩團軟綿綿嘅感覺似乎提醒我百密一疏，計漏咗駱以雪嘅上圍呎吋。




 
「變態佬！我告你非禮吖嗱！」
 
「…阿！邊個得閒非禮你呀…」我俾佢一嘢推開，但係為咗統測，我唔可以輕易放棄。
 
我一手撳住幅牆，阻擋佢嘅去路：「聽我講埋就放你走。」
 
佢由邊面走，我就撳住邊面嘅牆，形成一個佢不斷想走，又俾我困住嘅狀態。
 
「我想問…」
 
「你做咩呀？放開阿雪呀！」樓梯嗰邊有人大喝。
 
我望向聲音來源，係啱啱俾人停學兼革職，同時係年級第二名嘅前學生會副會長許正峰。