【全劇終】《我喺街執咗個失憶嘅女仔返屋企》: 統測篇：來訪（下）

「你唔係好想知道搶旗嗰日我點解會咁講？我而家俾個機會你。」
 
嗰日，佢講咗兩句令我唔能夠唔去在意嘅說話。
 
第一句係知道真相對我嚟講唔一定係好事。
 
第二句就係早排打過俾阿媽問，關於羅凱撒以前係咪識得我。
 
亦都係因為呢兩句，我更加肯定羅凱撒知道啲嘢。
 




佢繼續講：「我地今次鬥總名次，如果你排名高過我，我就將我所知道關於高小悠嘅嘢毫無保留咁講晒俾你聽，我發誓。」
 
我擰轉身，行近佢兩步。
 
「你鍾意發誓係你嘅事，我冇話過接受。」
 
「…點解？你唔係好想知道高小悠嘅事？」
 
「句點解應該係我問你，上次又係咁今次又係咁，點解你咁鐘意將小悠放上枱？」
 




「我講過，因為你地兩個係我喺呢間學校入面最感興趣嘅對象。」
 
「雖然都冇諗過你會講，不過我循例都問吓你點解啦。」我嘆口氣。
 
「哼，想我講嘅話，你應該知道要點做？」
 
「我唔會同你輸賭，如果你肯無條件咁講我會好多謝你，就算你唔講，我都會自己去搵答案。」
 
「你點搵？你當自己私家偵探？」
 




「唔知，或者我呢一世都唔會搵到，不過我唔想再當其他人係賭注。」
 
過咗一陣，佢撳住副眼鏡講：「有意思，我對你愈嚟愈有興趣。」
 
我冇理佢，轉身就走。
 
頭先我其實只係講咗一半，我唔同羅凱撒輸賭，除咗因為唔想將小悠當做賭注，仲因為呢場打賭我根本冇可能贏，要我短時間內成績超越羅凱撒，我偷試卷都未必做到。
 
而且最重要嘅係，今次嘅統測我有我努力嘅理由，我唔容許任何人玷污呢份意志。
 
淨低嘅半日，我一邊聽書一邊思考點樣可以令成績進步得更快。
 
因為羅凱撒間接提醒咗我，一味死抄notes同死聽書唔係冇用，但呢種方法要長期作戰先有效果，我而家需要嘅係短時間內喺統測入面拎到好成績。
 
就算靠補習，我諗都趕唔切。




 
呢個時候，Miss崔把聲好似上帝之音一樣：「唔經唔覺就快統測喇，大家如果喺學習上遇到咩問題，歡迎同學之間互相指教，咁樣係最快亦都最易去理清concept架，而且仲可以請教吓有咩搶分秘訣…」
 
同學之間互相指教…？
 
Miss崔講得冇錯，我需要去問吓人。
 
而問嘅人除咗成績要好好，仲要係我識得嘅，最好係平易近人。
 
我將年級第一名嘅羅凱撒（溝通不能）以及年級第二名嘅許正峰（直頭冇傾過計）排除，之後就係年級第三名——
 
雖然平易近人呢一點有待商榷，不過…應該叫做有計傾嘅（我諗）