【全劇終】《我喺街執咗個失憶嘅女仔返屋企》: 統測篇：來訪（上）

返學日。
 
我由第一堂開始就全神貫注，連平時冇乜點抄嘅筆記都寫滿咗幾頁。
 
張廷宇見到之後反應好似撞鬼一樣：「你有病呀？小息喺度抄notes？」
 
「殊！唔好嘈住我！」我睥一睥佢。
 
「小悠，你可唔可以打我一巴…我想知自己係咪發夢…」張廷宇對小悠講。
 




「好呀！」
 
然後係一下俐落嘅兜巴星，小悠好似一啲都冇留手。
 
「…呀！！！你個衰妹使唔使咁大力呀！！！」張廷宇撳住塊面問。
 
「又係你叫我打你一巴嘅。」
 
我無眼睇佢地嘅鬧劇，決定將集中力放返喺notes上：「你地要玩行遠啲；仲有你，咪遮住個黑板！」我指住小悠大聲講。
 




「我之前都話架啦！阿帆俾我感染開始溫書呀！」
 
「你地兩個…乜on9有得傳染架？」張廷宇將手放喺我額頭。
 
我一嘢拍開佢隻手：「你個死仔得閒就溫吓書啦，就嚟統測架喇！」
 
「見到阿帆咁俾心機！我都要加油！」小悠跑返自己位，仲拎咗本書出嚟溫。
 
張廷宇望吓我，又望吓小悠，忽然面容扭曲：「救…救命呀！！！呢度有兩條友撞邪呀！！！」跟手跑埋出班房。
 




我得以耳根清靜，準備抄埋淨低嘅notes嗰陣，目光突然同走廊嘅羅凱撒對上，佢示意我出去。
 
我諗咗一陣，然後起身。
 
經過小悠隔離時，佢好似好認真咁溫緊書，冇察覺到我同埋班房外嘅羅凱撒。
 
「咩事？」
 
「我地行遠少少，你都唔想俾佢聽到我地嘅對話？」羅凱撒瞥向班房入面嘅小悠。
 
講完之後佢行去走廊另一邊，我跟埋上去。
 
「有咩要講就快啲講，唔好阻我時間。」
 
佢戚起嘴角，托一下眼鏡：「你好似好積極咁準備嚟緊統測週？」




 
「關你咩事？溫書又犯校規呀？」
 
「哼，見到你咁努力，我好想獎勵一下你。」
 
「收皮啦，我唔係你屋企隻狗。」
 
「咁如果我話，我嘅意思係想俾多一個努力嘅理由你，唔知你又肯唔肯做你口中嘅狗？」
 
「唔需要，多謝。」講完我轉身走。
 
佢喺後面叫住我：「嚟緊嘅統測，我要同你輸賭。」
 
我停低腳步。