【全劇終】《我喺街執咗個失憶嘅女仔返屋企》: 過去篇：決意

我繼續碌落去，碌到差唔多最尾。
 
「5月15日 晴
今日係冇返學嘅第四十五日，塊臉已經冇再痛，不過摸落去依舊有種令人唔舒服嘅觸感。我第一次有勇氣企喺鏡前面，發覺如果用頭髮遮住嘅話，就唔會咁覺眼。或者有一日，我會有勇氣返學…」
 
呢篇寫得好長，碌極都未完，不過我喺某行文字發現阿妹提及我，於是停下動作。
 
「令我擔心嘅唔係我嘅學業成績，都唔係我習唔習慣嘅問題，而係阿哥，阿哥佢呢幾個月嚟都冇返過學，雖然佢唔想我知道，不過我估大概係因為佢想照顧我，同埋覺得呢件事或多或少都關自己事…
 
一開始我係有少少嬲佢，點解唔一早聽我講離開嗰度。不過兩個月喇，要補償要賠罪嘅乜嘢都夠啦…佢唔值得為咗我唔返學咁耐。我試過叫爸媽勸阿哥快啲返學，可惜好似唔係咁有用，佢地話我一日唔返學，阿哥都唔會返。明明需要多啲時間嘅只係我，點解佢要咁做呢…




 
我知道架，阿哥一直唔開心，係因為我成績好過佢，爸媽成曰讚我又唔讚佢，但佢唔知道爸媽其實一樣好錫佢，喺我心目中，阿哥永遠係個英雄，我唔會忘記細個嗰陣阿哥會俾晒啲玩具我玩，我俾人蝦嗰陣又會幫我出頭——即使我只係個喺孤兒院度接返嚟，無啦啦住喺佢屋企嘅陌生人…」
 
再碌落去，日記就完咗。
 
目光喺眼前文字來回多次，不停翻睇每一句。
 
如果唔係呢篇日記，我真係唔會知道阿妹原來有呢種諗法。
 
一直以嚟，我單方面認為自己拖累阿妹，至會陪佢一齊唔返學，冇諗過原來佢掉返轉咁為我著想過…




 
阿妹臉上嘅傷疤的確由我做成，雖然佢平時會用頭髮遮住，但件事發生咗就係發生咗，正如佢所講嘅一樣，身體上嘅傷口可以復原，但內心嘅傷痕永遠唔會磨滅，不過唔代表我地可以原地踏步，眼白白望住一個又一個嘅遺憾發生。
 
兩年前，我冇及時知道阿妹嘅心意，我希望兩年之後嘅今日先去彌補返唔會太遲。
 
我輕手輕腳走入阿妹間房，佢冇鎖門。
 
我將佢部電腦放喺書枱上面，然後摸黑行近佢床邊。
 
阿妹已經瞓著咗，月光落喺佢側臉，令我隱約見到佢臉上嘅疤痕。




 
我輕輕繞起佢耳邊嘅頭髮，用手背掃一吓佢塊面。


 
一種悔恨交加嘅情感由心底湧出，我握實拳頭，呢刻嘅意志無比堅定。