【全劇終】《我喺街執咗個失憶嘅女仔返屋企》: 過去篇：無法磨滅的傷疤

「唔好再打啦。」阿妹喺側邊勸，但我火遮眼聽唔入耳。
 
我一路同條八婆打交，一路失控講：「我係佢阿哥呀！」
 
「癡撚線架你！」條八婆不停避開我攻勢，想搵空間反擊。
 
就喺我同眼前八婆糾纏嗰陣，眼尾掃到某條嘍囉突然撲去阿妹嘅方向，我想撳住佢但已經太遲。
 
同一時間，我聽到一聲慘叫。
 




我即刻擰轉面，只係見到阿妹左臉上有條血痕，而嘍囉手上拎住染血界刀。
 
身體好似石化一樣，眼白白望住眼前畫面。
 
「做咩事呀？」老師終於發現今次騷動，即刻上前制止咗我同條八婆。
 
之後，阿妹俾學校送咗去急症室。
 
全程得阿妹個班主任Miss同我陪住佢，期間我不斷打俾阿爸阿媽，但冇人聽。
 




最後，醫生話阿妹臉上嘅傷口冇大礙，但好番之後會有條疤痕。
 
嗰一晚，我求姑娘俾我喺病房陪住阿妹，佢地開咗張摺床俾我瞓喺隔離，而阿妹就一直用被褸住自己，我點叫佢都唔肯拎開。
 
「對唔住。」已經唔知講咗第幾次。
 
「我仲未搵到阿爸阿媽…不過我會繼續打，佢地一定會返嚟睇你架。」我喺隔離講。
 
冇回應。
 




「你點解唔出聲呀？淨係冚住自己，點樣都好你俾我睇吓你情況啦。」
 
都係冇回應。
 
冇幾耐，有索鼻聲喺阿妹被舖傳出嚟。
 
然後，係一把微弱到幾乎聽唔到嘅聲線：「…我有叫你行第二度。」
 
聽到呢句，喉嚨好似俾人用力鏈住一樣，乜嘢都講唔出。
 
因為阿妹講得啱。
 
佢一早叫我行第二度，我唔聽。
 
佢叫我唔好惹班人，我唔聽。




 
甚至喺開拖嗰陣，佢叫我唔好同條八婆打，我都當係耳邊風。
 
目的唔係保護阿妹或者幫佢出頭呢種偉大嘅理由。
 
而係為咗一己私慾——
 
因為睇唔過眼阿妹太叻，想喺佢面前威返次，扮演阿哥嘅角色。
 
阿妹就成為呢個自私且無聊嘅欲望下嘅犧牲品。
 
我再冇出聲，聽住阿妹喺被入面斷斷續續喊咗一晚。
 
嗰次之後阿妹一直匿埋喺房，學又唔返，街又唔出，冇再望我一眼。之後阿爸阿媽短暫返過嚟，可能因為咁阿妹情況好轉，叫做肯應我單字，又會食我放喺佢房門口嘅飯。
 




為咗廿四小時照顧阿妹，加上一種贖罪心態，我由阿妹冇返學嘅第二日開始缺席學校課堂，如果係我累到阿妹冇得返學，導致佢成績下跌；咁我呢種人大概都唔配有得返學。
 
之後兩個月裏面，我日日喺屋企陪住阿妹，阿妹亦由一開始唔肯出房，慢慢肯跟我返醫院覆診，甚至落街散步，呢一切令我更加相信，我陪佢一齊唔返學係正確嘅。