【全劇終】《我喺街執咗個失憶嘅女仔返屋企》: 追到上天台

跑上八樓，天台道門果然開咗。
 
我慢慢行出去，見到珀奈趴咗喺欄杆上面喊。
 
「珀奈？」我行近佢講。
 
珀奈嗚嗚嗚咁喊咗一陣，就趴住咁講：「你走，我知你唔係佢。」 
 
珀奈講嘅佢，唔使問係羅凱撒啦。
 




根據同阿妹同住十幾年嘅經驗，當女仔喊嗰陣，你同佢講乜都係冇Q用嘅（大概），所以我唔出聲等佢喊完。
 
幾分鐘之後，珀奈終於肯離開個欄杆，佢抹一抹眼淚：「點解佢要咁對我呀？ 」
 
呢個時候，我先發現珀奈件恤衫最上面嗰幾粒鈕開咗，仲隱約見到裏面嘅喱士邊，我即刻望向第二度。
 
「珀奈，你件衫…」
 
「是但啦，反正已經冇所謂。」
 




「你頭先喺七樓…」見到珀奈衣衫不整咁，都唔難想像佢喺入面做乜。
 
羅凱撒呢個死仆街有冇咁幸福…
 
「反正你地啲男仔都係想咁咋嘛！我咁做有咩問題呀？」
 
果然，頭先佢想色誘羅凱撒。
 
「第二個我唔敢包，不過呢招應該對羅凱撒冇乜用。」
 




「我而家咪知囉！但我就係鍾意佢吖嘛…」講到呢度佢又開始喊。
 
雖然一直望向第二度，但聽住珀奈啲喊聲，我就諗羅凱撒到底係性無能定係Gay，至會對住一個咁惹人憐愛嘅校花都可以不為所動。
 
可惜這些機會不是屬於我的，我唯有嘆一口氣：「唉，我仲以為嗰次你喺男廁喊完已經諗通咗添。」
 
「咁你係咪覺得我好蠢吖？我就係咁蠢咁又點呀？」
 
「我只係覺得羅凱撒on9啫，你咁靚俾我都即刻狗衝啦。」
 
珀奈呆望住我，我先知自己一時口快講咗心聲出嚟。
 
唉屌。
 
我解釋：「我意思係，你根本唔需要做呢啲嘢。」




 
「你唔明架！」珀奈扣返啲衫鈕之後，就開始喊住講：「（一堆我聽唔明嘅日文）」
 
「嗯、嗯。」我一路扮明一路點頭。
 
「（一堆我聽唔明嘅日文）」
 
「係囉，個羅凱撒真係好撚on9。」我求其噏。
 
講完一堆日文，珀奈突然問我：「你聽得明咩？你識日文架？」
 
「吓，唔識架，不過聽你語氣應該係鬧緊羅凱撒啦。」
 
「你唔識聽又唔問！咁你點俾comment呀？」
 




「咁你頭先講咩呀？」
 
「我唔想講多次呀！點解你唔識日文呀？」珀奈無理取鬧嘅樣，依然係咁可愛。
 
「一係你教我囉？」
 
隔咗一陣，珀奈答：「你會唔會好似佢咁呃我？」
 
「吓？」
 
「佢明明話我肯教佢日文嘅話，佢就會同我去街，結果都係呃人架！」
 
唔怪得之前搶旗嗰陣羅凱撒口噏噏咁噏咗堆日文，原來珀奈教佢嘅。
 
「我都冇要求你同我去街，不過你唔介意係我嘅話，我個個禮拜都好得閒架。」我梗係食住個勢上。




 
講到呢度珀奈終於笑返，我靈機一觸諗起日本人好似好鍾意四葉草，於是喺書包摷返小悠之前送我嘅四葉草。
 
「唔好再喊啦，我送啲嘢俾你。」
 
但準備送之前，又突然諗起小悠將四葉草交到我掌心嘅表情。
 
同埋嗰個意外之吻。
 
……都係送第二樣。
 
我將頭先小食部買嘅士多啤梨朱古力放到珀奈手心：「請你食啦。」
 
「你點知我鍾意食呢隻朱古力架？」睇嚟佢好鍾意份禮物。
 




「日本人應該鍾意返日本牌子架嘛，我祝你食完唔使再遇到羅凱撒呢啲賤男啦。」
 
珀奈用日文講咗句多謝。
 
「呢句我識！即係多謝吖嘛！」
 
「車，你淨係識呢句…」
 
「唔係架，我仲識yamete kimochiii同ikuiku…」
 
「你個鹹濕仔！」
 
之後我同珀奈喺冇人嘅天台你追我逐，成個畫面浪漫到不行。