【全劇終】《我喺街執咗個失憶嘅女仔返屋企》: 一個平凡的晚上

返到屋企之後，見到小悠一路食零食一路做功課。
 
頭先掛住同珀奈喺天台玩順便學咗陣日文，所以我叫小悠自己返嚟先。
 
「阿帆！你終於返嚟嗱？」
 
「嗯，羅凱撒囉…要我等佢半粒鐘。」我梗係唔會話係去咗搵珀奈，更何況搵珀奈只係個意外，我本身真係去搵羅凱撒嘅。
 
「佢地有冇迫你參選呀？」
 




屌，差啲唔記得！頭先淨係掛住珀奈，都醒唔起要同羅凱撒講！
 
我求其答：「唔知呀，到時先算啦都係。」
 
小悠冇講乜，繼續寫寫寫。
 
過咗一陣，我先醒起今日根本冇功課：「你寫咩呀？我地今日有功課咩？」
 
「冇呀，不過我喺度溫統測咋嘛。」
 




我笑咗：「統測都要溫？你使唔使呀？」
 
之後我唔知佢係反問定單純疑問：「乜統測唔緊要架咩？」
 
「以學生角度嚟睇，應該冇人會覺得緊要，就算溫你都留返大考先啦。」
 
「大考係幾時呀？」
 
我打開手冊個校曆表：「聖誕假返嚟之後呢，我地就大考，之後就放新年。」
 




小悠突然雀躍：「係喎，嚟緊就嚟聖誕，你有咩節目呀？」
 
「都冇咩特別，反正阿爸阿媽唔喺度，我同阿妹又好少慶祝嘅…但今年話唔埋。」如果年尾之前我同珀奈一齊咗，就可以過第一個出pool後嘅聖誕…
 
不過，現階段所有嘢都係FF，我要加把勁至得。
 
「話唔埋？」
 
我敷衍帶過：「話唔埋咪話唔埋囉，我想表達嘅係你唔應該將人生嘅時間浪費喺溫統測呢樣嘢上面。」
 
「我想試吓俾心機溫書嗰種感覺係點樣咋嘛。」
 
我忽然諗起阿妹講過小悠嘅實力唔簡單，於是試吓問：「咁你溫咗咁耐有咩成果？」
 
佢諗咗一陣：「唔…我諗我明點解你地咁憎測驗同考試。」




 
「你終於明喇咩？」望住小悠個蠢樣，我有啲鬆口氣，嗰次應該真係阿妹搞錯咗。
 
講開又講，之前搵咗本簿諗住寫低關於小悠嘅嘢，以便我更加了解佢，不過整整吓都冇再寫過，我趁機喺房摷返本嘢出嚟，然後用本書遮住。
 
「哼哼，阿帆你俾我感染咗開始溫書喇。」
 
「係呀係呀，收聲啦你。」我由最近開始回憶起有關小悠嘅嘢，一路諗一路寫。
 
至於搵返小悠記憶嘅最關鍵線索，我始終覺得係羅凱撒。
 
夜晚。
 
我趁小悠瞓咗，就趴喺窗邊播返中三嗰陣珀奈sd俾我啲錄音聽，一邊回味我地今日喺天台嘅事。
 




「高田帆？我係hana呀，見你呢幾日都冇返學，你ok嘛？」嗰陣我同珀奈唔熟，佢仲叫緊我全名。
 
「我幫你拎咗啲功課呀，不如我上你屋企俾你好唔好呀？」
 
「高田帆，我講樣嘢你聽你覺得好唔好笑？今日英文堂嗰陣呢，Miss將beach講成bitch，之後有人問佢係咪話緊自己…」
 
「你妹妹嘅事，我聽海sir講咗喇，不過我冇同其他人講架…我想講嘅係，大家都好想快啲見到你返嚟架！」
 
我逐段逐段聽，兩個月加埋有近一百條，每次換電話我都唔捨得del，因為唔係珀奈嗰陣每日鼓勵我嘅話，我應該唔會踏出屋企門口。
 
聽聽吓嗰陣，突然有敲門聲。
 
我輕輕打開房門，係阿妹：「哥，記得聽日放學陪我去整電腦呀。」
 
「嗯，我梗係記得啦。」阿妹最近電腦壞咗，想我放學陪佢去整。




 
「仲有呀！下下個禮拜統測喇，你記得要開始溫書呀。」
 
「知喇，我溫緊架喇。」
 
「咁我去瞓喇。」
 
「嗯係呀，阿媽好似好掛住你，你得閒打個電話俾佢吖。」
 
阿妹點吓頭，之後返咗自己房，冇幾耐我都上床瞓咗。