【全劇終】《我喺街執咗個失憶嘅女仔返屋企》: 是敵是友？

到咗第二日。
 
早會時段又俾羅凱撒用嚟做個人show，宣佈關於許正峰被革職嘅事。
 
「…以上，至於副會長補選，暫定安排喺統測之後進行，我地將會喺稍後邀請有潛力嘅同學參選，多謝大家。」
 
羅凱撒向台下鞠躬，然後落咗台。
 
我唔知佢口中嘅有潛力同學係咩意思，不過小悠先俾佢地揀完去聯校宿營，應該走唔甩架喇；
 




至於我雖然都有份去，但希望佢地念在我只係俾小悠拉落水，唔好嚟搞我。
 
一旦入咗學生會，前方就係公務嘅無間地獄，唔單止要幫手統籌學校活動，仲要處理同學嘅申訴，簡單啲講即係乜柒都關你事，我都係乖乖地做個平凡人就可以。
 
雖然冇得否認，做咗學生會又真係會有好多待遇嘅。
 
講返許正峰，聽講除咗革職之外，佢仲俾學校記咗一個大過兼停學三日，所以呢幾日應該唔會見到佢。
 
但有樣嘢始終未搞清楚，根據駱以雪講嘅，上年搞事嗰個似係羅凱撒，而且就算許正峰將所有嘢攬上身，都唔代表唔可以係羅凱撒叫佢咁做，我怕就怕許正峰只係食死貓。
 




不過咁樣覺得嗰陣，我就會諗返起羅凱撒救我嘅情形。
 
如果佢真係要鏟除異己，大可以由我碌落山，反正嗰個高度都唔會死得去，明明我成日同佢作對，佢應該好唔妥我至係。
 
到底點解？
 
唔通上年出術嗰個真係唔係佢，係駱以雪一直單方面誤解佢？
 
唔知駱以雪點睇許正峰呢單嘢，雖然佢咁憎羅凱撒，九成九覺得許正峰係受佢唆擺。
 




總之羅凱撒呢個人，我而家仲未摸清佢底細。
 
穩陣起見，我決定放學鏟上學生會，提前通知佢地我唔會玩咩補選（以防萬一佢地真係玩嘢要我參加）。
 
眨吓眼到咗放學。
 
我叫張廷宇同小悠喺小食部等我，我就一條友貢上七樓搵羅凱撒。
 
諗住推門入去，就見到珀奈喺入面衝出嚟。
 
而且，仲要喊緊。
 
「珀奈！」我叫住佢都冇用。
 
我即刻入去質問羅凱撒：「咩事呀？你又整喊佢呀？」




 
「哼，係佢衝入嚟發癲先，仲要搶咗天台鎖匙走。」羅凱撒un un腳坐喺度答。
 
「咁你唔追住佢？」
 
「搶鎖匙呢件事我會按校規處理，使乜勞煩我追佢？」
 
我眼火爆，留低句屌你老母之後就跟住珀奈頭先嘅方向走。