【全劇終】《我喺街執咗個失憶嘅女仔返屋企》: 接通過去的電話

「你同以前一樣，一啲都冇變過。」
 
我趴喺窗邊，回想下晝羅凱撒呢句野。
 
我諗咗好耐都唔明係咩意思。
 
雖然讀同一間學校，但我肯定中五開學之前從未見過佢，最多只係上年佢選學生會嗰陣知道吓佢個名。
 
但係佢講得出「以前」，即係佢一早識得我，仲講到好似好了解我一樣。
 




我諗過佢會唔會係初中嗰陣唔知邊度聽過我個名就喺度懶熟，不過諗落太牽強，因為我呢啲路人，佢冇理由會知道我個名。
 
我諗返小學、幼稚園有冇識得一個叫羅凱撒嘅人，連畢業班相都摷埋出嚟，最後都係零發現。
 
所以我決定等到而家半夜，去問兩個可能會知道啲嘢嘅人。
 
如果我真係識得羅凱撒嘅話，阿爸阿媽冇理由唔知。
 
房入面得休比玩跑輪嘅聲，我見時間差唔多，就拎埋個電話行出房，費事一陣嘈醒小悠。
 




要特登等到三更半夜，係因為阿爸阿媽嗰邊而家應該放lunch，有時間同我講電話。
 
我喺摷返N年都唔打一次嘅阿爸阿媽電話，然後撥出。
 
希望唔會嚇親佢地，因為平時我地慣咗send msg，真係有緊急嘢先會用到打電話呢招。
 
響咗一陣電話接通咗，係阿媽把聲：「Hello？」
 
「媽…」
 




「帆帆？係咪帆帆呀？」
 
「嗯，不過我咪叫咗唔好再叫呢個名囉！」每當呢個時候，我特別明白阿妹嘅心情。
 
「哈哈哈，一時口快快，係咪有咩急事呀？」
 
「你而家得唔得閒講電話呀？」
 
「等等，」一堆雜音之後，阿媽把聲返嚟：「你講啦？」
 
「我有啲嘢想問吓你。」
 
「要特登打電話嚟問？你搞大咗人地個肚呀？」
 
「唔係呀！」




 
對面傳嚟笑聲：「哈哈哈哈講吓笑啫，你邊度脫離到青頭吖？」
 
雖然好想吐槽邊有老母會咁咒自己個仔，不過都係問嘢要緊：「我想問啲以前嘅嘢。」
 
「以前？有咩好問呀？」
 
「你地知唔知我有冇識得一個叫羅凱撒嘅人？」
 
「羅凱撒？」
 
「嗯。」
 
阿媽突然冇出聲，靜咗十幾秒。
 




「媽？」
 
「冇咩印象，做咩呀？」
 
「咁，我以前有冇試過撞親個頭意外失憶嗰啲？」呢個頭先諗到嘅，就係我真係識得羅凱撒，不過唔記得咗佢。
 
「梗係冇啦，睇電視劇睇懵你呀？」
 
雖然我都覺得膠劇味濃，但除咗呢個又諗唔到其他可能性。
 
「到底咩事呀？」
 
如果要詳細講，就要連小悠嘅事都講埋，所以都係hea過算：「冇呀，學校有條友叫羅凱撒無啦啦話自己以前識我。」
 
「咁離奇？一係咁啦，我幫你問吓你老豆啦。」




 
「都好。」雖然冇抱太大希望，不過問吓冇壞嘅。
 
「但係你老豆呢排忙到癲，我諗佢要遲啲先覆到你架。」
 
「慢慢啦，唔急。」
 
「咁你仲有冇嘢問呀？冇嘅我去食飯喇？」
 
「冇喇。」
 
「你嗰邊而家…半夜兩點？晴晴瞓咗未呀？叫佢嚟聽吓？」
 
「佢一早瞓咗喇，你掛住佢嘅話我聽日叫佢打俾你吖。」
 




「佢應該喺你隔離咋嘛？你叫醒佢咪得囉？」阿媽突然強人所難，而且佢應該唔記得我同阿妹已經分咗房好耐。
 
「其實我地而家中五，冇一齊瞓好耐架喇。」
 
「吓？乜你地中五嗱？」
 
「係呀，啱啱開學呀。」
 
之後佢唉聲嘆氣：「唉，又會大得咁快嘅？明明冇幾耐之前晴晴最鍾意攬住你瞓覺。」阿媽講嘅冇幾耐之前，其實已經係小學嗰陣。
 
「媽，你快啲去食飯啦。」再唔收線嘅話，佢應該有排講。
 
「係喎差啲唔記得一陣仲要開會，我得閒幫你問吓你老豆啦，嗰條友叫羅咩話？」
 
「羅凱撒。」我重覆一次。
 
「羅凱撒呀？okok。」
 
收線之後，我就返咗房瞓覺。