【全劇終】《我喺街執咗個失憶嘅女仔返屋企》: 回程（下）

我以為係阿妹，點知係個冇加過嘅電話。
 
不過，憑佢send嚟嗰張食緊雪條嘅自拍，加埋嗰句：好想食雪條（附帶好多個心形），我已經知道係邊個。
 
唔使問，一定係阿妹將我個電話話俾千惠知啦！
 
望住千惠將雪條輕輕含喺嘴入面個樣，我突然吞咗啖口水。
 
佢send句咁嘅嘢嚟，唔會係想表達啲咩意思…掛？我諗。
 




忽然feel到一陣仇視目光，原來駱以雪喺隔離睥住我個mon。
 
「哈哈，坐坐吓旅遊巴都有雪條食，隔離學校真係幸福…吖！！！」我求其蒙混過去，下場係俾駱以雪一腳伸返去原先個位。
 
坐第一排嘅Miss似乎俾磅一聲同我嘅慘叫驚動，行咗過嚟：「發生咩事呀？」
 
「冇、冇事，我唔小心跌親。」我搓住心口講。
 
小悠喺後面企咗起身，個口依然含住三支pocky，喺度「唔唔唔」唔知噏乜。
 




「你噏乜呀？」
 
佢將三支pocky從嘴裏拎出：「我話呀，你嚇到我整跌咗包pocky呀。」
 
「返去賠返俾你囉。」雖然好想同佢講呢個pocky債應該搵駱以雪還，但望住駱以雪嘅凌厲眼神，我都係選擇收皮。
 
架旅遊巴un咗粒幾鐘，終於返到學校。Miss見我地攰，所以好快就解散，呼吸到校外新鮮空氣嘅一刻，我有感今次多災多難嘅聯校宿營終於完咗。
 
同小悠返屋企嗰陣，我問：「阿妹話買埋外賣俾我地，你想食咩？」
 




佢將指尖放喺嘴唇，諗咗諗：「我想食樓下茶記嘅雲吞麵！都係唔好，我想食米線…」
 
「雲吞麵定米線呀？」
 
佢傻笑兩聲：「可唔可以叫阿妹兩樣都買呀？」
 
我嘆氣：「唔知佢肯唔肯架吓。」
 
Send完訊息俾阿妹之後，我地繼續沿住返屋企嘅路行。
 
我諗，而家會唔會係個好時機去問小悠頭先件事。
 
但係，應該點開口好？
 
諗咗兩秒，我決定開咗個頭先算：「頭先喺房入面…」




 
我諗咗好耐，唔知下半句應該講咩。
 
「做咩講到一半又唔講呀？」
 
「我想問你有冇整親啫。」
 
屌，冇理由問佢我地有冇錫到架？
 
「整親？」
 
「er... 」我er咗好耐都er唔出啲咩，睇嚟重提呢件事所需要嘅恥力比我想像高，我決定算數：「都係冇嘢喇。」
 
點知小悠好似get到：「你講我仆落你度嗰陣？」
 




我猶疑咗陣，然後點一下頭。
 
「我冇事，有你墊住我吖嘛。」佢瞇瞇笑咁講。
 
我以為佢會主動提，但佢都係冇提到。
 
一係佢就真係冇意識到發生咩事（如果係小悠嘅話絕對有機會），一係佢就知咩事，不過覺得不值一提。
 
重點唔理佢係邊種都好，點睇而家都係得我一個喺度在意！！
 
為免顯得成個傻仔一樣，我都係將件事暫時放喺心入面先。
 
返到屋企抖咗陣，阿妹就帶住四袋外賣返嚟，其中兩袋相信係小悠嘅雲吞麵同米線。
 
食完之後，小悠入咗房玩休比；而我就好快咁沖咗個涼，然後上床休息。




 
因為半夜有一件好重要嘅嘢要做。