【全劇終】《我喺街執咗個失憶嘅女仔返屋企》: 聯校宿營篇：行動（上）

「我地而家要點做？」我跟喺駱以雪身後問。
 
佢一句得埋嚟：「你白痴？梗係搵佢地出嚟先。」
 
「我係指你有咩方法可以快啲知佢地喺邊。」對住佢真係好L無奈。
 
「呢個山頭唔算好大，要搵一定搵到。」
 
明，即係鳩行啦…
 




我梗係冇講出口：「咁行快啲啦，我想快啲完。」
 
佢睥一睥我：「被迫同你組隊嗰個係我，句嘢應該係我講。」
 
之後我地又行咗陣，我頂唔順嗰份尷尬，所以求其諗啲嘢講。
 
「覺唔覺今日好曬？」根據唔知邊度研究，冇嘢講嗰陣講天氣係最好嘅。
 
佢冇理我一直行。
 




「…睇你個樣平時一定行開山嘅。」
 
「你講少陣廢話得唔得？」佢擰轉頭講。
 
「你叫學校啲老師仲好啦。」
 
突然，駱以雪拉埋我匿埋喺棵樹後面。
 
我手臂俾樹幹撞一撞：「呀，咩料呀？」
 




「殊！搵到佢喇。」
 
我望望出面，發現千惠就喺附近。
 
「支旗好大機會喺佢度。」駱以雪喺我耳邊講。
 
「…不如都係算啦。」直覺話俾我知，我地而家出去一定有排煩（各種意義上）…
 
「你唔係好想end game架咩？而家咁好機會你話算？」
 
「我睇件事未必咁簡單，可能係一個局嚟，目的係引我地出嚟一網打盡。」平時睇偵探小說見得多呢啲對白，估唔到今日有機會鳩噏吓又幾好玩。
 
「點都好，我地去確認吓先。」講完佢行前少少，又匿埋喺第二棵樹後面，當正自己拍緊電影咁。
 
見佢咁認真我都放棄爭論，唯有希望千惠見我唔到。




 
「一陣我衝出去分散佢注意力，然後你趁機會撳佢喺地下，摷吓支旗喺唔喺佢身。」睇嚟佢冇諗過將我排除在外。
 
「撳佢喺地下仲要摷？會唔會唔係太好呀？」我打咗個突。
 
「你怕嘅話咁掉轉囉，你去分散佢注意力，我就趁機摷佢。」
 
「等、等陣先…」
 
佢無視我句等等：「三，二，一，去！」然後一嘢推我出去。
 
「高田帆？」千惠滿面笑容咁跑過嚟。
 
「…Hi。」我求其同佢打招呼。
 




「你無啦啦彈出嚟嘅？你跟蹤我呀？」
 
「咁啱行過啫，諗多咗喇你…」
 
佢突然翹住我隻手：「反正都係，咁一齊行啦？」
 
趁駱以雪仲未出嚟，我偷雞同千惠講：「你自己搵機會走啦，駱以雪喺樹後面伏緊你。」
 
佢聽完之後，嘴角一揚。
 
然後喺電光石火之間，駱以雪由樹後面衝出嚟想將千惠撳落地，不過千惠好快避開，仲一個反手將駱以雪撻咗響地，成套動作流暢到以為睇緊奧運一樣。
 
我呆喺原地，一時間唔識反應。