【全劇終】《我喺街執咗個失憶嘅女仔返屋企》: 聯校宿營篇：行動（下）

「嘻，多謝你自己送上門。」千惠對駱以雪講完，就一手將佢背後個名牌撕落嚟。
 
駱以雪自己都shock咗吓，應該冇諗過會咁易俾人撕咗個牌。
 
「一日都係你，高田帆…」佢啲語氣好似想殺人咁。
 
「又關我事？！」
 
「就算佢頭先冇同我講，我都一早知道你地匿埋喺樹後面。」千惠話。
 




駱以雪聽到之後喺度兇我：「即係你真係講咗俾佢知啦？」
 
「咁，我都係想大家和平共處啫。」我解釋。
 
千惠笑咗吓，然後扶起駱以雪：「你抖吓先啦，老師好快會過嚟搵你。」
 
「唔好懶好心，唔係高田帆嘅話我根本唔會輸俾你。」駱以雪繼續口硬。
 
而家冇埋駱以雪，即係我地隊應該得返羅凱撒、小悠（如果佢仲未俾人撕嘅話）同埋我。
 




「等等，你趁而家撕埋我個牌啦。」咁我就可以同駱以雪一齊unun腳等返營地。
 
但千惠居然笑笑口拒絕：「唔得，我唔想你咁快返去住。」
 
我暗地嘆口氣，呢個時候千惠突然撳住貼咗紗布嗰隻眼，好似用完寫輪眼咁款。
 
「喂，你點呀？」
 
千惠擰頭，隻手一直撳住尋日個傷口。
 




「不如你喺度一齊等老師啦？」
 
佢抬頭同我講：「雖然我都想和平共處，但係我地今年一定要贏。」
 
「體育館真係咁重要？」
 
「唔單止因為體育館，仲係因為我選學生會嗰陣應承過全校今年一定會贏。」
 
…原來係政綱之一。不過千惠會去做，點都好過有啲人選完就兩個樣，諗到呢度我居然有啲欣賞佢。
 
「你下個目標係邊個呀？」
 
「梗係羅凱撒啦，不過下晝開始就冇見過佢，又唔知喺度玩緊咩。」
 
「都係嗰句啦，小心啲。」雖然啱啱見識過佢嘅實力，但對住羅凱撒呢啲陰險小人，都要小心架喇。




 
「咁我行先。」
 
臨走之前，千惠無啦啦錫咗我塊面一吓，我想避都避唔切。
 
最慘係整個過程俾駱以雪目擊到：「原來你地係呢種關係，唔怪得頭先將我個計劃爆俾佢聽。」
 
「…呢種關係，係咩意思先？」
 
換嚟嘅，係駱以雪一面鄙視。