【全劇終】《我喺街執咗個失憶嘅女仔返屋企》: 聯校宿營篇：組隊（下）

「你要搶旗？」差啲唔記得呢樣嘢嘅存在，如果搶到旗並帶去指定地點嘅話，遊戲就會結束。
 
「係，對面而家淨返兩個人，呢個係最好嘅機會。」
 
「等等，兩個？唔係三個咩？」我明明記得頭先帶隊老師話係三個。
 
不過佢好快解答我，佢將一個名牌掉到我前面：「我啱啱搞掂咗一個。」
 
名牌上面係個唔識嘅名，即係話而家阿妹嗰隊得返佢同千惠，支旗亦都喺佢地是但一個度。
 




「你話想搶旗，有冇問過羅凱撒架？」雖然應該都係冇架喇…
 
結果我冇估錯：「冇，呢個係我自己做嘅決定。」
 
「咁你點解搵我組隊？」
 
「搶旗唔同撕名牌，對手唔會揸住支旗等你嚟搶，兩個人一齊勝算會大啲。」佢懶係有紋有路咁：「至於點解搵你，因為我冇可能搵羅凱撒，而高小悠就跑得太慢，同佢一組會好唔方便。」
 
我暗地贊同最後嗰點，因為尋日阿妹已經試過。
 




「所以，即係被迫揀我啦。」我自言自語。
 
「你咁理解冇錯，有得揀嘅話我都唔想同你組隊。」
 
…果然。
 
呢個時候，我突然望到佢嗰件未乾透嘅PE衫，目光好自然停留喺佢胸前，而家變得若隱若現嘅位置…
 
一秒咁多。
 




「你要我應承都得，不過之後你要應承返我一啲嘢。」
 
「應承你乜嘢？」佢似乎對我嘅討價還價不滿。
 
「未諗到，諗到先講。」
 
佢好似意識到啲嘢咁鏈實咗自己衫領：「你唔好以為我唔知你頭先喺度偷窺我。事前聲明，如果你要我應承嘅係啲奇怪嘢，我會直接報警。」
 
竟然咁都發現，仲要用到偷窺呢個字，而且，報警係咩意思！？
 
「你放心，我對暴力女冇興趣…嘩呀！」俾駱以雪一拳中埋去嘅唔係我，而係我後面棵樹，不過依然成功嚇到我拿拿聲起步。