【全劇終】《我喺街執咗個失憶嘅女仔返屋企》: 聯校宿營篇：組隊（上）

宣佈開始之後，我同千惠就分別去咗唔同方向。佢應該去捕羅凱撒，而我當然去搵阿妹。
 
不過喺山頭盪咗一陣，唔好話阿妹，半個人影都冇。
 
我坐咗喺棵樹下面抖，因為真係好L曬，曬過上晝。
 
早知係咁帶支水啦…
 
抖到咁上下我準備起身，雖然好想求其有條友快啲撕我名牌等我可以quit game，但此時此刻都係阿妹要緊。
 




我拍吓啲泥，決定邊行邊諗吓有冇方法快過羅凱撒搵到阿妹。
 
突然，附近有啲怪聲。
 
聽真啲，似係某人嘅喘氣聲。
 
我轉身一望，發現咗聲音來源。
 
「頭先先講過下晝再同你計，估唔到真係咁快俾我撞得返你。」
 




又係駱以雪。
 
「救命，你放過我啦。」雖然啱啱抖完，但喺猛烈太陽底下，我已經再冇力氣同佢玩你追我逐嘅遊戲。
 
佢無視我嘅抗議，向我呢邊加快腳步。
 
我掉頭走嗰陣，佢一手扯住我後領。
 
「你想點呀副會長？抖吓都犯校規呀？」我慘叫。
 




「我今次唔係嚟同你講校規。」佢好似仲未抖順條氣。
 
「你唔講校規會有咩講？」真係睬都佢傻。
 
「我想同你組隊。」
 
「吓？」
 
佢抖咗幾啖大氣之後講：「我想同你組隊。」之後放開咗我。
 
我轉身問佢：「無啦啦組咩隊？」
 
佢好似真係幾熱，熱到身上嘅PE衫都濕埋，我冇嘢怕，係怕佢中暑搞著我。
 
「你使唔使坐低抖吓呀？」




 
之後佢自己行咗去樹下面坐低，我就坐喺另一邊。
 
冇幾耐佢應該抖夠，然後講返頭先個話題：「我想同你組隊，因為我計劃緊搶旗。」