【全劇終】《我喺街執咗個失憶嘅女仔返屋企》: 聯校宿營篇：下半場

經過尷尬嘅午膳時間，我地又返番今朝集合嗰度，好似話下午開始之前有嘢要宣佈。 

然後帶隊老師出嚟，表情嚴肅咁講：「首先多謝各位同學頭先都表現得好投入，但喺宣佈上午得分之前，有一樣非常重要嘅嘢想提醒大家，就係無論咩情況之下，惡意傷害他人身體係兩間學校都唔容許嘅，如果再見到有類似事件發生，校方會立即終止活動，希望大家徹底緊記。」 

然後佢再補充：「我會咁講係因為尋日同今日上晝，校方都分別收到投訴懷疑有人用石頭攻擊友校嘅同學而導致佢地受傷，所以喺度重申一次，校方絕對唔容許呢啲行為。」 

尋日嗰單我知，因為送完千惠去醫療室之後係我向Miss投訴嘅，但頭先原來又有人掟石仔，我都冇留意到。 

睇嚟羅凱撒為咗贏，真係乜都做得出，連有無人機監視都可以照樣出茅招，阿妹佢地好危險… 





「好，而家宣佈上午嘅淘汰人數同暫時得分…」 我地呢邊走咗兩個人，得分係13；而隔離校就走咗三個人，得分同我地一樣都係13。 即係話，下晝嘅撕名牌戰連埋我嘅話只係得返7個人。 

由背後有冇名牌呢點嚟睇，我推測另外6人應該係羅凱撒、駱以雪、千惠、阿妹、小悠同埋阿妹嗰隊一個女仔。 

而家兩隊仲要同分，羅凱撒陣間一定咬住阿妹佢地唔放，甚至再出咩茅招都唔出奇… 所以，我要做嘅只有一件事：保護好阿妹（同千惠，仲有另一個女仔）。 

之後，照舊有半粒鐘準備時間，羅凱撒照舊棟喺度、駱以雪照舊唔知去邊、小悠照舊去搵螞蟻、我照舊發吽哣。 冇幾耐千惠突然走埋嚟，似係佢地嗰邊已經準備完畢。 

「我冇估錯，你仲未俾我地淘汰。」





 「…冇辦法，我實力太強勁。」實情係成個上晝我有大半時間喺度瞓覺，淨低嗰啲就係同駱以雪糾纏…

 千惠笑咗一聲：「你唔好咁得戚住，必要嘅時候我會親手將你名牌撕落嚟。」 

「講到可以好輕易撕到我咁，話唔定係我撕你呢？」

都唔知得戚嗰個係邊個… 

「好呀，如果你撕到嘅話…呢20分咪送俾你囉。」 





等等，20分？ 

「你係會長？」

我恍然大悟。 

「你呢個咩反應？我好唔似會長咩？」

 的確，由外表嚟睇應該冇乜人會將千惠拉去學生會會長呢個term度。

 不過，重要嘅唔係呢樣，而係羅凱撒。 

如果千惠值20分嘅話，佢嘅處境應該比阿妹更加危險… 

「喂，你諗緊咩呀？」 





都係提吓佢好啲：「你小心啲羅凱撒又對你掟石仔，你已經盲咗一隻眼，我唔想你盲埋第二隻…」 

「你擔心我嘅話，陣間我地一齊行動囉？」 

「…唓，你唔好阻住我瞓教。」 

呢個時候，例牌嘅無人機同埋唔知邊度傳嚟嘅聲再度出現：

「各位同學，而家係下午兩點正，我宣佈下晝嘅山野攻防戰正式開始。」