【全劇終】《我喺街執咗個失憶嘅女仔返屋企》: 聯校宿營篇：上半場開始

距離遊戲開始淨低唔係好多時間，我望望阿妹嗰邊，佢同其他人圍埋傾嘢，千惠都喺入面，雖然隻眼仲係貼住紗布，但佢一樣察覺到我嘅視線，離遠對我揮咗兩吓手。
 
我帶住有啲尷尬嘅心情回應佢嘅揮手。
 
再望返自己呢邊，完全冇要討論嘅跡象，駱以雪同另外兩個男嘅更加係一早唔知行咗去邊，得返羅凱撒棟喺度。
 
雖然決定瞓覺，但總要有人出吓聲，所以我問佢：「呀會長，我地使唔使傾吓支旗俾邊個keep？」
 
「呢個問題並冇討論價值，啲咁重要啲嘢當然要由我親自保管。」
 




「但係，我地唔使諗吓策略？你睇吓人地學校？」
 
「哼，唔需要。」佢托吓眼鏡繼續講：「呢個遊戲本身就有一個致命嘅bug喺度。」
 
睇佢個樣，好似好期待我會問佢係咩咁，所以我特登唔出聲。
 
結果dead air咗幾秒，佢先講埋落去：「……就係我。」
 
然後又靜咗兩秒。
 




「哦。」我木無表情咁答，順便趁而家通知佢：「既然你一個打十個，其他人喺咪度都冇分別啦，記住陣間唔好阻我瞓覺。」
 
「哼，隨便你。到你醒返之後，體育館已經會落喺我地POWER手上。」
 
我費事再應佢，諗住揾吓小悠喺邊，先發覺佢頭先開始就唔見人。
 
「喂，見唔見小悠？」
 
羅凱撒冷笑一聲：「睇嚟你真係每一刻都想要同佢一齊。」
 




我窒咗窒：「…關心吓親戚個女又關你咩事？」
 
「希望你呢個親戚個女，唔會帶俾你麻煩。」又喺度九唔搭八。
 
呢個時候小悠拎住一塊青色嘢返嚟：「阿帆！你睇吓我搵到啲咩！」
 
我走埋去，先知係一塊四葉草：「頭先搵極都唔見人，原來你去咗摘人地啲草？」
 
「我跟住地下啲螞蟻行嗰陣發現架。」佢轉動手上嘅四葉草，望落好開心咁款。
 
我輕嘆一聲：「咁你頭先有冇聽到陣間嘅規則？」
 
佢如我所料，恍然大悟咁樣：「死喇！我唔記得咗呀…咁而家點呀？」
 
我將一陣嘅規則解釋一次俾佢聽，講到半路羅凱撒喺我地身邊經過，留低一聲「哼」同埋一個意味不明嘅笑容之後就走咗。




 
「明唔明呀？」我有啲擔心小悠嘅理解能力究竟應唔應付到一陣個game。
 
「…明。」佢一臉迷惘咁點頭。
 
「不如你陣間同我一齊瞓覺啦…」等陣，咁講好似有啲奇怪…於是我即刻改口：「…我係指，我地求其搵個地方柄埋算。」
 
「唔得！呢場戰爭係關乎學校出年有冇體育館用，阿帆你都俾啲鬥志啦！」
 
「…居然話係戰爭。」睇嚟羅凱撒尋晚順便洗埋佢腦。
 
小悠突然將手上嘅四葉草插咗落我頭髮：「呢個送俾你吖，會帶俾你好運。」
 
「…你擺啲咩喺我個頭度呀？」我準備抆返落嚟，但俾佢制止咗我：「你唔好整返落嚟啦，你戴得幾好睇呀。」
 




「唉，是但啦。」費事佢又扁晒嘴，我最後接受咗呢份禮物。
 
呢個時候，我地頭頂開始有啲無人機飛嚟飛去，然後唔知邊度傳嚟帶隊老師把聲：
 
「各位同學，而家時間係上午九點正，我宣佈山野攻防戰正式開始。」