【全劇終】《我喺街執咗個失憶嘅女仔返屋企》: 聯校宿營篇：山野攻防戰

到啱啱瞓得著嗰陣，已經俾帶隊老師摷醒，佢話食完早餐之後，我地要去尋日野外定向嘅終點集合，我先醒起今日全日得一個叫山野攻防戰嘅活動。
 
我一邊食自助早餐，一邊諗呢個咁on9嘅名究竟係邊個改。
 
「阿帆！你試吓個炒蛋！好好食呀！」小悠坐喺我對面，枱面擺滿佢拎返嚟嘅嘢食。
 
一同佢對到眼，我就諗起佢尋晚同羅凱撒出去傾計嘅事。
 
「做咩呀？你飽嗱？」
 




我擰頭，用叉拮咗一啖炒蛋放入口：「又真係幾好食喎。」
 
「都話架啦！我再攞多啲返嚟好唔好呀？」
 
望住佢一貫嘅天真表情，我覺得尋晚可能真係我諗多咗。
 
最後，我花咗唔少口水至阻止到小悠將出面嘅炒蛋全部據為己有。然後，就到咗集合嘅時間。
 
「跟住落嚟會講解山野攻防戰嘅規則，大家要細心聽清楚…」帶隊老師用咗半粒鐘講陣間點玩法，之後係Q&A環節。
 




我喺心入面消化一次，得出以下重點：
 
1. 成個活動分做上下晝進行，中間有食飯時間
 
2. 遊戲形式係透過搶旗同撕名牌攞分（安排今日活動嗰個應該係Running Man 嘅fans）
 
3. 搶旗：每隊各有一支旗，值30分，當某一方嘅旗被搶奪並帶到指定地點，遊戲會即時結束
 
4. 支旗會由一個隊員保管，呢個人可以隨時換
 




5. 撕名牌：喺學生會擔任嘅職位將會影響名牌代表嘅得分；會長20分、副會長16分、其他10分，而凡人（即係我同小悠呢種唔係學生會，只係被推薦嚟嘅人）就值6分
 
6. 扣分制：俾人撕咗牌嘅話會被即時淘汰，仲會扣除名牌所值嘅一半分數（即係我個牌值6分，被人撕咗嘅話我隊就會扣3分）
 
7.宣佈開始後30分鐘先可以開始搶旗同撕名牌
 
另外唔知邊度嚟嘅財力，活動全程會有無人機監察。
 
仲有一樣，因為我地學生會得4個人，所以小悠補上咗10分嘅位置，令獲得分數變得公平。
 
解釋得七七八八之後，老師宣佈每隊有30分鐘時間準備，之後遊戲就會正式開始。
 
理解完遊戲規則後，我好快制定咗策略——
 
求其搵個位柄埋瞓覺，瞓到宣佈結束為止。




 
呢啲咁複雜嘅game，唔係咁適合我。