【全劇終】《我喺街執咗個失憶嘅女仔返屋企》: 聯校宿營篇：隱藏實力?

「我地一陣再見！」小悠一聽見開始，就一支箭咁走咗去，睇嚟好認真對待呢個遊戲…
 
而我，就按原定計劃搵咗個隱閉地方，再匿埋喺樹後面補眠。
 
因為尋晚唔夠瞓，所以我好快瞓著咗，仲夢見珀奈都嚟咗呢個宿營，我地一齊喺樹下面瞓覺。
 
夢到一半嗰陣，突然有人用力拍醒我：「哥？」
 
我不情不願地睜開眼，見到阿妹個樣鬆一口氣。
 




「你做咩瞓喺度？差啲以為你暈咗喺地…」
 
「我見有啲眼瞓休息一吓啫，」我捽一捽塊面，「而家幾點呀？」
 
「十一點幾喇，過多陣就會放lunch。」
 
原來我瞓咗兩個幾鐘。
 
阿妹背後嘅名牌完好無缺，即係仲未俾人淘汰，但令我在意嘅唔係呢樣，而係佢小腿上一條小傷痕。
 




「你隻腳幾時整親架？」我即刻上前睇清楚。
 
佢好似而家先發現咁：「哦，可能頭先跑嗰陣唔小心整親。」
 
「不如去醫療室睇吓先啦？」我擔心唔知有咩入咗阿妹啲血。
 
「邊使咁誇張呀？普通擦傷咋嘛，返去貼膠布就冇事。」阿妹好輕鬆咁講。
 
我確認應該真係一個細傷口之後，鬆咗口氣：「咁你返去記得貼呀。」
 




「得喇，仲長氣過阿爸…等陣，你個頭有啲嘢？」
 
「咩呀？」我掃一掃，頭先小悠送嗰塊草跌咗落我手上。
 
「咩嚟架？」
 
「哦，頭先小悠送嘅垃圾嚟啫。」我求其將塊草塞落褲袋。
 
阿妹突然表情一轉：「哥，我有啲嘢想同你講。」
 
「有咩咪講囉？」
 
佢欲言又止咁樣，我諗起尋日開始佢就係咁：「好嚴重架？」
 
「係關於小悠。」




 
佢跟住講落去：「你記唔記得尋日考試個分組？」
 
聽佢講完，我腦海一秒浮現出被千惠告白嘅事，於是口窒窒咁答：「…梗係記得啦，做咩？」
 
「咁你知唔知，學校係點樣根據成績決定我地嘅分組？」
 
我諗返尋日的確係話考試排名會影響分組，但就唔知詳細，所以我擰頭。
 
「學校為咗平均每組實力，用咗對稱嘅方法將我地分成6組。」
 
「咩意思？」
 
「即係第一同第尾一組；第二就同尾二一組，如此類推。」
 




雖然唔知學校點解認為考試同野外定向嘅表現係有關，但我諗唔明嘅係阿妹講呢啲嘅目的。
 
「咁關小悠咩事？」
 
「我地本來嘅計劃係由我喺考試入面扮失手，乘機同你地會長一組，再喺野外定向嗰陣拖慢佢進度。」
 
「你係指考試嗰陣你特登考包尾，目的係同永遠考第一嘅羅凱撒同組？」
 
佢點一吓頭，然後話：「但結果係點，你已經知道。」
 
「等陣先！」我將佢頭先嘅說話消化咗一次，終於明白佢想講咩：「你係想講，尋日嗰個考試小悠高分過羅凱撒？」
 
「唔係你點解釋我會同佢一組，而唔係同你地會長？」
 
「冇可能，」我斬釘截鐵咁講，「一定係出咗咩差錯。」




 
尋日嗰份卷程度唔算淺，而且小悠做到一半已經趴咗喺度，點會係第一名？
 
「我好肯定我喺考試入面係包尾嗰個。」
 
「我唔係唔信你，只不過，會唔會係咁啱有人成績差過你？又或者學校改咗分組方法呢？」
 
阿妹好似有啲唔忿氣：「我只係想提你，小悠可能唔係表面睇咁單純。」
 
「就算你講嘅係真，佢咁做有咩目的？為咗打亂你地嘅計劃，等你地贏唔到體育館？」
 
「而家邊個同你講體育館呀？我係驚…」
 
「驚？」
 




阿妹窒咗吓，然後講：「我係驚佢無啦啦埋你身有咩目的咋！」
 
我忍唔住笑咗出嚟：「佢可以有咩目的？你睇膠劇上腦呀？」
 
「你唔信就算。」講完之後佢擰轉身。
 
我拎返塊四葉草出嚟，諗起頭先小悠送佢俾我嗰陣嘅表情，然後嘆咗口氣。
 
「多謝你話俾我聽，不過我相信小悠，佢唔會有咩目的。」我摸摸阿妹嘅頭髮。
 
突然，附近傳出一陣腳步聲。
 
阿妹即時變得警戒，我同佢一齊望向聲音來源，發現一個身影正向我地步步進迫。
 
「大鑊喇，係駱以雪。」