【全劇終】《我喺街執咗個失憶嘅女仔返屋企》: 聯校宿營篇：野外定向（上）

雖然呢個叫千惠嘅女仔的的骰骰，但行得幾快，我要花啲氣力先可以跟上佢。
 
話時話學校都冇派詳細地圖俾我地，好彩我都唔笨，知道世界上有樣嘢叫google map。
 
「你喺度做咩？」千惠問。
 
「開google map囉，唔係點搵路？」
 
佢居然恥笑咗兩聲：「呢度荒山野嶺，如果你啲數據咁都收到嘅話記得介紹我用。」
 




結果如佢所言，load咗十世都load唔到：「咁我地惟有跟大隊行啦。」唔識路嗰陣最好嘅方法就係跟住其他人。
 
「其實點解你覺得我會唔識路？」
 
「喂大佬你都識講荒山野嶺啦，你估而家喺學校咩，講到咁輕鬆。」
 
佢好有把握咁笑，然後話：「不如我地輸賭，如果我15分鐘之內去到第一個checkpoint，你全程都要聽我指揮；如果我去唔到嘅話，就我聽你。」
 
就算用跑嘅，我諗15分鐘都未必去到，更何況仲要搵路…既然佢咁想輸，我都唔諗住阻佢：「咁你等住聽我指揮都得喇。」





為咗令佢心服口服，我開埋計時。
 
之後佢兜入小路行咗一陣，又穿過一個草叢，一件神奇嘅事發生——我嚟遠見到checkpoint 1。
 
「See? 」佢懶得戚咁回頭。
 
「…你簽完到先講啦。」我死撐。
 
「辛苦晒兩位同學仔喇。」埋到去之後有個工作人員講，然後黐咗個寫住1嘅貼紙喺我地手臂。
 




我望吓電話，只係過咗12分幾。
 
「我想問有冇組快過我地到？」千惠問工作人員。
 
「同學仔暫時係最快嗰組。」
 
唔使望，我都知而家千惠個樣有幾得戚。
 
「頭先唔知邊個叫我等住聽佢指揮呢？」
 
我學卡通片咁擰咩面吹口哨。
 
「跟我嚟啦！我地要攞第一名。」
 
我快步跟住佢後面問：「點解你會知有條咁快嘅路？」




 
「睇嚟佢地咩都冇同你講。」佢口中嘅佢地，相信係指羅凱撒班人。
 
「咩意思？」
 
「學校唔會派地圖，所以我地要自己去探路。頭先考試之前嘅休息時間，你唔發覺啲人出晒去咩？」
 
佢一講又好似係，頭先得我同小悠喺飯堂度食燒賣。「你地出晒去就係為咗熟習地形？」
 
「唔係你覺得我地喺冇地圖嘅情況下真係可以去晒5個checkpoint？」
 
然後佢催我：「行快啲，我唔可以輸。」
 
我地接二連三過咗幾個checkpoint，中途唔太見其他人，我地應該仲領先緊。
 




「…都差唔多終點啦，抖陣先得唔得呀？」我開始上氣不接下氣。
 
千惠擰轉頭：「唔得，抖得嗰陣我會同你講。」
 
「使唔使chur成咁…」我細聲抱怨，點知都俾佢聽到：「唔快啲嘅話，一陣俾羅凱撒超前咁點？頭先一路都唔見佢，話唔埋佢又密謀緊啲咩。」
 
「乜原來你都唔gur佢？」羅凱撒果然四圍樹敵。
 
「你唔知上年嘅聯校宿營係佢使橫手所以先會搶到體育館？」
 
「我有聽過。」阿妹之前有講。
 
「雖然而家同計劃預期有少少出入，不過我一定會係最快到終點嗰個。」
 
「咩計劃呀？」




 
「呢啲係我地學校嘅戰略，唔同得你講。」
 
聽完我真係打咗個突：「仲要吹到戰略…有冇得用體育館真係咁重要？都唔知你地鬥乜。」
 
「如果你係羅凱撒派嚟想拖我後腳嘅話，我會喺度打暈你再抬你去終點。」佢笑瞇瞇咁講。
 
「咁你又唔使咁暴力，我又冇話唔行。」