【全劇終】《我喺街執咗個失憶嘅女仔返屋企》: 聯校宿營篇：分組（penana100讚加更）

今日發現ｐｅｎａｎａ嗰邊過咗１００讚，加吓更先。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝

食飯嗰陣，本來小悠話想搵埋阿妹一齊，奈何阿妹同自己學校啲人食，所以最後都係得我地兩條友。之後，就係公佈分組嘅時間。
 
我地又俾人叫返去同一個地方，白板上面貼咗一張似係分組名單。
 
「同學請依照分組名單坐，之後會講解野外定向嘅規則同計分方法。」老師宣佈。
 
我地總共分做六組（兩個人一組），我係第三組。順便望吓小悠，佢居然同阿妹一組。




 
「阿帆！你同邊個一組呀？」小悠同阿妹就坐我前面枱。
 
「…頭先掛住搵自己個名唔記得睇添。」
 
「我出去幫你睇吓！」小悠講完衝咗出去。
 
「你陣間可唔可以幫我照顧吓小悠？你知佢啦論論盡盡咁，我最驚佢盪失路…阿妹？」本來想叫阿妹睇住小悠，點知佢心不在焉咁樣。
 
「吓？咩事呀？」




 
「你做咩呆晒？」
 
「…冇…冇嘢。」佢個樣明顯有嘢。
 
「阿帆！原來你同…」小悠未講完，就有個女仔走埋嚟：「Hi，晴晴。」
 
阿妹同佢打咗個招呼，然後個女仔坐咗喺我隔離：「Hi，我地又見面喇。」
 
係頭先借塗改液嗰個女仔。




 
「原來我同你一組？」
 
佢伸隻手出嚟：「睇嚟我地幾有緣，我叫千惠。」
 
「我叫…」
 
講都未講佢就打斷咗我：「高田帆。」
 
「你點知架？」
 
「出面張紙有寫。」
 
我尷尬笑，係咁咦握咗佢隻手。
 




之後係老師講解規則。
 
「我地已經按頭先考試排名將大家分為二人一組，陣間每組需要去5個中途點簽到，最快完成並且二人一齊到達終點嘅組別將會每人得6分；第二名每人得5分，如此類推。中途點嘅位置已經發送咗去大家手機，請自行下載。」
 
我check吓電話，大概望咗啲checkpoint分佈喺邊。
 
「提提大家，如果中途skip咗任何一個checkpoint，又或者掉亂次序嘅話，將會被取消資格；而為咗鼓勵大家，第一名嘅組別除咗每人6分之外，今晚仲會有豪華自助餐食。」
 
唔使問，坐我前面嘅小悠聽到豪華自助餐幾隻字，啲口水已經流到落地下。
 
「好，如果大家冇問題嘅話，可以隨時出發，我地終點見。」
 
講完之後，小悠未等埋阿妹已經一支箭標走咗，阿妹喺後面叫都叫唔住。
 
唉，希望佢兩個唔好有問題…不過我有啲在意阿妹頭先嘅表情。




 
其他人陸陸續續出發，羅凱撒同佢個男黨羽一組，駱以雪就同隔離校嘅女仔一組。
 
「快啲跟住嚟！」
 
一不留神其他人已經走晒，所以我拿拿聲跟住呢個叫千惠嘅女仔行。