【全劇終】《我喺街執咗個失憶嘅女仔返屋企》: 聯校宿營篇：野外定向（下）

我地沿下坡路向終點朝進，為免尷尬我求其搵啲嘢講：「不如講吓你學校吖？」話唔定可以知道阿妹喺學校係點嘅。
 
點知佢直接無視我：「你頭先嘅意思係你都睇羅凱撒唔順眼？」
 
「唔好提啦，成個學生會冇個正常。」
 
「點唔正常法？」
 
「你睇佢用中指托眼鏡就知條友有隱性中二病，當正自己係輕小說主角，乜鬼野目標係創造理想中嘅校園之類嗰啲啦。」
 




佢聽完之後喺度笑：「你講真架？」
 
「你搵日同佢相處5分鐘就知我講嘅係咪真啦。」
 
「咁其他人呢？」
 
我一邊回想學生會各人嘅猙獰外貌：「仲有個淨係識捉人有冇犯校規嘅暴力女，然後兩個哈哈霸霸嘅嘍囉咁囉。」
 
我講完之後佢笑得更大聲：「我都係第一次聽到有人咁樣形容自己學校嘅學生會。」
 




「咁係吖嘛，去得選學生會嗰啲個腦都係有問題。」
 
千惠突然收起笑聲，企咗喺原地。
 
「…喂，咩事呀？」
 
冇反應。
 
唔通頭先嗰句得罪咗佢…？爭啲唔記得眼前呢個女仔都係學生會（隔離校嘅）。
 




「…我講緊我學校嗰啲呀。」我即刻補鑊。
 
然後電光火石之間，佢突然推開我，跟住係一吓叫聲——
 
有塊碎石喺唔知邊度飛出嚟，打中佢隻眼。
 
「喂，你點呀？」我即刻衝上前睇，但俾佢一野甩開：「冇嘢，我地繼續行。」
 
「有冇流血呀？你俾我望清楚先啦…」
 
「都話冇嘢咯，快啲行啦！」
 
擾攘緊嗰陣，羅凱撒嗰組突然喺前面小路行出嚟，望咗我地一眼。
 
無啦啦又會電視劇咁有石頭飛出嚟，除咗羅凱撒做之外，我都諗唔到其他可能性。




 
不過而家同佢拗冇著數，照顧咗千惠先。
 
點知一回頭，已經唔見千惠。
 
佢想追上羅凱撒，但行幾步就痛到踎低撳住隻眼。
 
我埋去揭開佢隻手，好彩應該係擦傷少少。
 
「我地而家追上去，仲嚟得切贏羅凱撒…」
 
「小姐，你痛得眼都擘唔大，點追呀？」
 
「我睇到路架，你跟住我行啦！」望住佢隻眼變到寫輪眼咁，就知佢勉強緊自己。
 




「唉…點解嚟個宿營都咁多麻煩嘢發生…」我烏低身：「我孭你去終點啦。」
 
「……」佢粒聲唔出，唔知係嫌棄定信唔過我。
 
「快啲啦，羅凱撒就嚟到終點架喇。」我將佢兩隻手搭上我膊頭，然後半夾硬咁孭起佢。
 
佢問咗個時機完全不合嘅問題：「你對其他女仔都係咁架？」
 
「我只係唔想再見到有人喺我面前受傷，但我咩都做唔到。」就好似兩年前嗰次咁…
 
「…如果我地輸咗俾羅凱撒嘅話，就入你數。」
 
「知道喇，跟住落嚟要點行呀？指揮大人。」
 
佢雙手扣實咗我一吓：「我知道有捷徑去終點，一路行一路講。」




 
「好，準備好未？」我內心數123，然後用最快嘅速度孭住千惠向前衝。
 
 
結果，靠住千惠嘅指示同埋我嘅全速前進，我地順利去到終點，比第二名嘅羅凱撒快分幾鐘。
 
之後我即刻帶千惠去醫療室，啲人幫佢檢查完話只係皮外傷，我鬆一口氣。
 
「Miss，我懷疑有人掟石仔。」喺醫療室外面，我偷偷同帶隊老師講。
 
「你有冇證據？」
 
「冇，不過頭先千惠受傷嗰陣，我見到羅凱撒喺附近。」
 
「呢件事交俾我處理，我會再去查。」之後Miss叫我返大隊先。




 
雖然一早知羅凱撒唔係咩好人，但估唔到佢光天化日之下都會放暗器，睇嚟為咗阿妹（同佢啲同學），真係唔可以再俾佢亂嚟。