【全劇終】《我喺街執咗個失憶嘅女仔返屋企》: 聯校宿營篇：考試（下）

我望吓小悠喺邊，原來佢坐咗喺最前面，同隔離個女仔喺度傾計，應該係阿妹學校嘅人掛。
 
冇幾耐阿妹都入咗嚟，我示意佢坐我隔離，但似乎遭到無視，最後佢坐咗喺我後面；至於我隔離，就俾個同阿妹一齊入嚟，身材的的骰骰嘅女仔坐咗。
 
「咳咳，各位同學安靜喇。」帶隊老師到咗之後，喺白板寫低考試時間為兩粒鐘。
 
仲有行字寫喺下面：是次考試排名將決定野外定向的分組，惟不算入兩校總分之中，請各考生注意。
 
咩話？仲要分組？不過唔理住，望吓份卷先。
 




「考試時間開始。」
 
我打開份卷，裡面咩科都有啲，同我地而家嘅進度差唔多，唔怪得要考兩個鐘。
 
做晒自己識做啲題目之後，我望一望前面嘅小悠，佢竟然趴咗喺枱度，隻手唔似寫緊字。
 
唔通佢瞓著覺？
 
我偷偷地喺度笑，之前先笑完我垃圾，點知原來仲廢過我…
 




呢個時候我feel到櫈背磅一聲，阿妹喺後面細細聲鬧我：「你笑咩呀？專心啲啦！」
 
「係嘅…」雖然咁講，但識做嘅題目理論上我都做晒，而其他都唔會因為睇多幾次而忽然識做，所以我做咗個明智決定——
 
學小悠咁，瞓覺。
 
但瞓唔夠10分鐘，就俾啲塗改液聲嘈醒，隔離個女仔唔知係喺度擾敵定係用緊咩新式出貓方法，拎住支塗改液係咁chok係咁chok。
 
佢不時望吓出面個鐘，手上嘅動作愈嚟愈急，配合埋有啲焦慮嘅表情，令我相信佢應該真係咁啱用晒支塗改液。
 




唉，幫吓你嘞…
 
我輕輕力將自己支塗改液碌過去，佢見到之後拎咗嚟用，我就大安旨意繼續瞓教。
 
阿妹應該以為我真係做完，所以冇再踢我櫈背，我得以瞓到考試宣佈結束嘅一刻。
 
收卷之後，其他人圍埋傾頭先啲題目，我惟有希望陣間分到嘅組唔會太差，不過我諗差極都仲有小悠墊我底嘅。
 
之後係食飯時間，準備走人嗰陣，隔離個女仔拋返支塗改液俾我：「喂，還返俾你。」 
 
我一手接住，臨走前不忘提醒：「好彩頭先唔係正式考試，下次記住帶多支士啤。」
 
「等陣，點解我未見過你嘅？」
 
我停低腳步：「如果你指學生會入面嘅話，因為我只係臨時嚟湊數，你未見過我好正常。」




 
佢笑咗幾聲：「嚟得呢度即係你學校睇好你組下屆學生會，你咁都唔知？」
 
就算係，被睇好嗰個都係小悠，而唔係我，況且…「我地學生會興玩無限連任，所以我應該同組學生會呢樣嘢冇緣。」
 
見個女仔冇出聲，我趁機會閃人：「唔講喇，走先。」
 
「嘻，我地好快會再見面。」