【全劇終】《我喺街執咗個失憶嘅女仔返屋企》: 聯校宿營篇：考試（上）

我地呢兩日住嘅係一幢兩層高建築物，底層係飯堂同休息室，上層就分成兩間房，每間學校一間，即係話我要同學生會嘅人瞓埋同一間房，知道呢個事實嗰陣，我內心屌咗一聲。
 
安頓好晒之後，自稱今次宿營主持人嘅羅凱撒向我地簡單講解時間表：第一日上晝係考試，下晝係野外定向；第二日就係山野攻防戰。
 
先忽略山野攻防戰呢個令我有不安感嘅名詞，我到底做錯啲咩，至會嚟到山卡啦都要考試…
 
好彩考試之前有半粒鐘休息時間，小悠趁機會抆咗我落飯堂，話要確認食物質素咁話。
 
「啱啱喺旅遊巴先啪咗幾盒百力滋，你食得落咩？」雖然我都係跟佢落咗嚟。
 




「梗係食得落啦…！」
 
又咁啱真係俾佢買到幾袋燒賣，佢放咗一粒落嘴，然後一臉滿足：「呢度啲嘢食都唔係你講到咁差啫…」
 
我拮咗一粒試吓，又的確唔差，咁啱有啲餓，就自己買咗袋嚟食。
 
食食吓樓梯嗰邊有啲腳步聲，我轉身一睇——阿妹都應該放緊休息時間，同幾個同學有傾有講咁。
 
我下意識匿埋喺小悠隔離，但都係冇用，因為小悠大大聲同佢打招呼。
 




阿妹有啲尷尬咁向我地呢邊揮手。
 
阿妹走遠之後，小悠問：「你地做咩咁見外呀？」
 
「…我喺出面好少會主動話係佢阿哥，你都係呀，成日阿妹前阿妹後，換著我都覺得尷尬啦。」
 
「咁…不如我以後改口叫佢晴晴？」
 
「你可以試吓嘅，如果你唔怕佢打你嘅話。」
 




突然間，一把熟悉嘅聲音響遍成棟樓，一聽就知係羅凱撒用緊中央廣播講嘢：「全體參加聯校宿營嘅同學注意，15分鐘之後請帶備文具到演講廳集合。」
 
「阿帆我行先喇！你慢慢食啦！」居然唔等埋我…小悠究竟係有幾雀躍…
 
快手解決袋燒賣之後，我返房拎咗筆袋就去到羅凱撒所講嘅演講廳，入面分咗6張長枱，每張枱放咗兩份相當有份量，相信係試卷嘅物體。
 
「…大鑊喇今次真係。」睇嚟冇2粒鐘，我都冇得離開呢度。於是我求其揀咗個位坐低。