【全劇終】《我喺街執咗個失憶嘅女仔返屋企》: 聯校宿營篇：出發

宿營當日。
 
阿妹一早出咗門口，雖然我地目的地係一樣，但因為要經學校旅遊巴，所以都係各自返學校。
 
「早晨，去旅行呀？」看更陳伯可能見到我一袋二袋，所以咁講。
 
「唔係，去宿營咋。」實際上我嘅一袋二袋全部都係小悠話要帶去嘅零食，正因為咁我開始後悔同佢講嗰度（我推測）只有好難食嘅canteen。
 
「早晨呀陳伯！阿帆你行快啲啦！」講完之後小悠一個箭步上前。
 




今次宿營除咗我同小悠之外，就只有羅凱撒同佢三個嘍囉，同埋一個隨隊老師同行，所以見到停泊喺學校外面嗰架旅遊巴之後我打咗個突。
 
「…使唔使咁大架呀？」我地平時交嗰啲學生會費應該就係浪費喺呢啲無謂嘢度。
 
上車之後我同小悠坐喺中間嘅前後座，帶隊老師坐最前；羅凱撒同其他三個學生會成員就隔到好開咁坐，直頭好似陌路人咁樣，睇怕佢地之間都係狗咬狗骨。
 
順帶一提，坐喺我隔嚟排嘅係駱以雪，佢坐低之後就時不時向我呢邊望過嚟，一副想捉我幾時犯校規嘅樣，我睥返佢轉頭，佢就好快將目光投向窗邊，我決定費事理佢。
 
「阿帆，你睇吓！」小悠拍一拍我。
 




佢對窗外嘅所有風景都好好奇，會問我呢啲係咩嚟、嗰啲點解會咁，我都好有耐性去解答佢，明嘅，畢竟佢除咗返學之外都唔會點出街，對呢個世界感到好奇係正常。
 
但呢種感覺真係好似湊住個女去小學親子旅行。
 
例如而家，佢又好似個小學生咁對住窗外嘅路人揮手；而啲路人又會好友善地對小悠揮返手…望住呢個畫面，我只係希望我地唔會俾人當係特殊學校。
 
「阿帆你食唔食呀？」今次佢遞咗包pocky問我。
 
我嘆一口氣，好想提佢我地而家唔係去郊遊，係去交流，睇個勢就知我地學校同對面女校有幾大差異，至少喺學生嘅心智年齡上。
 




一諗起嚟緊兩日一夜仲要玩乜鬼嘢計分賽，我有一刻想用手上嘅pocky了結自己。
 
「嗰邊嗰兩位同學唔該檢點少少，旅遊巴唔係俾你地食嘢嘅地方。」講呢句嘅明顯係隔離嘅駱以雪。
 
「哦，知道喇副會長。」我將啲pocky隊晒入口，然後大大聲答。
 
佢睥咗我兩眼，又望返出窗。
 
哈，睇住佢咩都講唔出個樣，突然覺得有啲好玩。