【全劇終】《我喺街執咗個失憶嘅女仔返屋企》: 被選中嘅細路

但世事嘅嘢，你愈係覺得唔關自己事就愈係搵上門，避都冇得你避，而呢個道理正好喺之後個小息得到確認——
 
小悠拎住張通告，好開心咁同我講佢成為被選中嘅細路，可以同學生會一齊去聯校宿營，睇佢個樣，一定又係因為冇參加過呢種活動所以先咁開心。
 
本來咁係唔關我事嘅。
 
「都唔知你咁開心做乜…諗起全程都要對住學生會嗰4條茂利就唔開胃…」
 
「咁我之前從來都冇試過去宿營吖嘛，我覺得一定好好玩！」嗱，都話架啦。
 




不過有樣嘢我諗唔明，明明小悠只係一個入學冇幾耐嘅新同學，成績更加唔係突出（不如話佢根本未考過試），點解學生會無啦啦推薦佢？仲有，羅凱撒之前點解要佢加入學生會？
 
結果兜嚟兜去，又係兜返去羅凱撒點解對小悠咁有興趣呢個謎題上。
 
繼續諗落去頭都爆，雖然有諗過叫小悠唔好去，但佢100％唔會肯，所以我放棄。
 
況且，我有件事好似未同小悠講：「唔記得同你講，阿妹都會去宿營。」
 
佢聽到之後更開心：「真係嘅？」
 




「你唔記得咩？佢係隔離學校嘅學生會吖嘛，所以一定會去。」
 
「原來阿妹間學校就喺我地隔離呀？太好喇，咁我可以同佢一齊玩。」
 
一齊玩都係其次，最主要我係想叫阿妹幫手睇住小悠，唔好俾羅凱撒有機可乘。
 
「哼，等你地兩個去晒宿營之後，成間屋就係我架喇…」
 
小悠忽然陰陰嘴笑：「吖！唔記得同你講，頭先學生會叫我推薦多一個人俾佢地，你估吓我推薦邊個？」
 




我面上嘅表情一秒凝結：「你唔係吓嘩…」
 
佢冇正面答我，不過都等同宣佈我嘅美夢幻滅：「嗯！跟住落嚟嘅宿營都要請你多多指教喇！」
 
「等等，我都冇話去！」
 
「你唔記得閃靈現象？你真係放心我同你分開咁耐？」
 
「咁…」
 
最後，我駁唔到，所以之後個小息俾小悠拐咗上七樓學生會室，出返嚟嗰陣手上已經攞住一堆睇都唔想睇嘅注意事項。


如果大家想鞭打我寫快啲，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/




ＬＩＮＫ都貼埋，唔係唔去呀？！