【全劇終】《我喺街執咗個失憶嘅女仔返屋企》: 又係早會

我將隻龍貓公仔放咗喺窗邊，當係記念同小悠第一次出街。
 
之後，我地渡過咗風平浪靜嘅一個禮拜。
 
唯一一件值得講吓嘅事，可能係阿妹成功當選學生會，小悠知道之後，仲提議搞個驚喜party俾阿妹，之後我地三條友就吹咗啲氣球、買咗啲嘢食，同埋整咗塊牌寫住「恭喜阿妹當選學生會」咁喺屋企慶祝咗一晚。（正確嚟講，係我同小悠兩條友，因為阿妹見到塊牌之後已經直行直過咁返咗入房）
 
不過都冇影響小悠嘅興致，我真係諗唔明佢咁開心做乜，明明學生會係一件苦差。（先排除佢意思係串鳩阿妹進入呢個無間地獄…）
 
總之，就係咁啦。
 




然後，又到咗星期一嘅早會時間。
 
我地偉大嘅學生會長羅凱撒又企咗上台宣佈關於聯校宿營嘅事。
 
「各位同學，萬眾期待嘅聯校宿營終於會喺下星期舉行，地點係……」
 
我大大聲打咗個喊露，心諗呢啲野關我鬼事咩，快啲放我走啦契弟…
 
「而得到學生會推薦嘅同學，將會喺稍後收到個別通知，到七樓學生會室談及有關詳情。」
 




台下學生大致分做幾個派別，第一類係對羅凱撒講嘅完全冇興趣，只想快啲返課室嘅普通人；第二類係全神貫注聽緊羅凱撒講嘢嘅信徒們；淨係嗰類就係完全在狀況之外嘅魂遊派。
 
而我當然屬於第一類，順帶一提小悠應該係第三類。
 
呢個時候，羅凱撒視線落咗喺我身上。
 
從佢銳利嘅眼神中，我忽然好似估到佢想點——
 
喂唔撚係呀？個中二病會長唔係諗住公報私仇迫我參加乜鳩宿營呀？
 




好彩應該係我多心，佢望咗我一陣終於開口：「如有問題請向學生會查詢，我宣佈而家可以解散。」


如果大家想鞭打我寫快啲，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/
ＬＩＮＫ都貼埋，唔係唔去呀？！