【全劇終】《我喺街執咗個失憶嘅女仔返屋企》: 宿營前夕

夜晚，小悠興致勃勃咁同阿妹講我地三條友都有份去宿營。
 
點知阿妹聽完之後，個樣有啲驚訝：「你地學校竟然派你地去聯校宿營？」
 
我有種不祥預感：「…你個派字，係咩意思？」
 
「你地唔知架咩？學術交流只係掛名，聯校宿營嘅真正目的，係爭奪嚟緊學年體育館嘅使用權。」
 
「咩話？？？」應該樓下都聽到我把聲。
 




小悠依然懵盛盛…吖唔係，係一臉茫然：「咩體育館使用權呀？」
 
我解釋俾佢聽：「上次羅凱撒罰你去打掃嗰度呀…嗰座嘢因為係夾份起，所以每年都要搶到使用權先有得用…」
 
「上年宿營我地學校輸咗，所以體育館就落咗喺你地度。」阿妹補充。
 
「咁即係個宿營其實係一場比賽？」我問。
 
阿妹點咗吓頭：「或者咁講，成個宿營係採取計分制進行，最後邊間學校嘅總分高啲，就會得到體育館。」
 




「放過我啦…」我抱頭大叫。
 
但面對麻煩嘢嗰陣，小悠嘅反應永遠都係同我相反：「即係如果我地贏咗今次宿營，下年就可以繼續用體育館？」
 
「我寧願以後唔上體育堂…麻煩你問吓學生會長我可唔可以退出…」
 
「我記得你地今屆學生會係連任嘅？」阿妹問。
 
「係呀，佢地成功爭取無限連任，極權係咁上下架喇…你問嚟做咩？」
 




「…我聽返嚟架咋，我地學校師姐講，你地個會長上年係用咗唔知咩手段先會贏到聯校宿營。」
 
「羅凱撒份人咁陰險，係都唔奇。」
 
「雖然我唔係志在個體育館…不過你地最好提醒吓你地會長唔好再亂咁嚟。」講完之後阿妹起身返咗入房，「我去瞓先喇，早抖。」 
 
「早抖阿妹！」小悠同阿妹揮揮手。
 
「救命呀！」一諗起阿妹頭先講嘅嘢，我就頭痛。
 
我只係想有人答我，究竟係邊個發明用宿營去決定體育館使用權呢樣咁騎呢嘅嘢。
 
但天下間幾離奇嘅野都會有人欣賞，小悠一副額頭鑿住「好想快啲去」嘅表情望住宿營嘅日程表：「阿帆，我最近發現一件事。」
 
「又咩呀…」




 
佢一雙閃令令嘅眼睛望住我，講出一句得罪全世界學生嘅說話：「原來返學係咁好玩架。」
 
「仲好講…唔係因為你拉我落水，我使去呢個乜鬼宿營？」
 
「咁你當陪吓我囉？」
 
…佢講得啱，我去嘅唯一原因只係避免閃靈現象發生，乜野搶體育館之類係唔關我事嘅，唔好旨意我會幫羅凱撒出一分力。
 
「可能你第一晚已經想走喇…」
 
「我唔會架！」
 
「連去個宿營都要鬥嚟鬥去，呢個城市嘅教育制度真係悲哀…」我又唉咗一聲。
 




「…唔通上次同學生會長鬥完之後，你對比賽有陰影？」
 
我輕輕推咗佢額頭一下：「作死你呀？我只係覺得…呢種用嚟判定你係所謂精英抑或係垃圾嘅形式根本毫無意義。」
 
「咁阿帆你係精英定垃圾呀？」
 
「…邊有人問得咁直接架？」
 
「我覺得阿帆你一定係垃圾。」小悠維持一貫笑容，氣定神閒咁講。
 
「你…！」到呢一秒我都唔出手打佢，應該算做好有忍耐力（我諗）。
 
點知佢笑咗一笑：「一定因為你係垃圾，先會喺垃圾房入面搵到我～」
 
「…咩邏輯？」




 
「因為…物以類聚？」
 
我放棄深究佢呢個詞語究竟用得啱唔啱，反正撇除呢一點，我都唔會自大到走去自認做精英。
 
「照你咁講，你會出現喺垃圾房都係因為物以類聚？」
 
佢面不改容地講：「唔知呢？」
 
「唉…」我為我地嘅對話嘆一口氣，可能因為近得小悠多，我講嘢都開始變得奇奇怪怪。


如果大家想鞭打我寫快啲，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/
ＬＩＮＫ都貼埋，唔係唔去呀？！