【全劇終】《我喺街執咗個失憶嘅女仔返屋企》: 差距

我同小悠買咗個籠俾休比做屋企，點知佢唔領情不特止仲要噬咗我兩野。
 
 
「嘩…你隻死仔吖…」
 
 
「佢都唔鍾意個籠，你唔好迫佢啦。」小悠抱住休比講。
 
 
「你仲幫住隻死仔…明明個籠你有份揀架喎，又話佢一定會鍾意又盛…」




 
 
「咁我唔知原來休比鍾意自由自在架嘛！」呢個時候休比由小悠手上跳落嚟，一支箭衝入我間房，小悠馬上跟住佢：「你睇吓！佢好鍾意你間房！」
 
 
我走入去捉返佢地出嚟：「唔得，佢嘅活動範圍只可以喺廳。」雖然休比係好得意，但今朝我發現房入面多咗幾粒龍貓屎之後，決定唔會再隨便俾休比入房。
 
 
「明明尋晚休比都係瞓喺我隔離…」小悠扁晒嘴講。
 




 
「總之冇得傾，休比一定要瞓廳。」
 
 
「哼，咁我今晚都瞓廳！」

 
「是但你囉…」佢唔係以為我會心軟吖嘛？佢瞓廳仲好，我可以霸返成間房。

 




喺我地吵吵鬧鬧嗰陣，大門傳來鎖匙轉動嘅聲音，係阿妹返嚟。


「阿妹！你返嚟啱呀！」小悠拉佢過嚟：「你過嚟評吓理吖，你覺得我同休比今晚應該瞓房定瞓廳呀？」

 
阿妹望咗一眼休比，然後用鄙視眼神望向我：「…明明自己帶人返嚟，又叫人瞓廳，正一冷血。」

 
「又係我錯！？」

 
小悠聽到阿妹幫住佢，開心到跳起：「Yeah！阿妹果然明白事理…不過休比係我帶返嚟架，唔關阿帆事。」

 




…睇嚟小悠唔明白阿妹口中嘅「人」，唔係休比，而係小悠佢自己。

 
不過頭先係呢幾日以嚟，阿妹第一次正面回應小悠，可能上次買返嚟嗰啲雪條起到作用掛？點都好，都係一件好事嚟嘅。

 
「是但啦，總之呢排唔好煩我住，我要準備學生會競選啲嘢。」阿妹講完之後就入咗房（終於冇嘭門）。

 
「阿妹要選學生會？」小悠問。

 
「好似聽佢講過吓…」都唔出奇，阿妹咁優秀，會選學生會都正常。

 




「我會支持佢架！」

 
「關你鬼事咩？你又唔係佢學校啲學生…」

 
「唔係佢學校嘅學生唔可以支持佢架咩？」

 
「可以，你鍾意啦…不過你要記住阿妹學校同我地學校係兩個層次嚟，學生會一定好大競爭，我地呢排真係唔好打搞佢住喇。」

 
「知道！」

 




費事阿妹話我冷血，最後我都俾咗休比入房瞓。


如果大家嫌一日兩篇唔夠喉，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/
ＬＩＮＫ都貼埋，唔係唔去呀？！