【全劇終】《我喺街執咗個失憶嘅女仔返屋企》: 放學後的體育館

之後成日，我都冇乜心機上堂，放學諗住同小悠買籠俾休比，佢又唔知去咗邊。
 
一問之下，原來佢俾羅凱撒以上堂發呆為理由，罰佢放學要去打掃隔離嗰座體育館。
 
「唔該Miss崔。」我即刻去體育館睇吓乜情況。
 
因為嗰座體育館係我地學校同隔離女校（即係阿妹嗰間）合資起嘅，所以只有我地兩間學校嘅人至可以入去，但因為場地有限，每年都要爭奪體育館嘅使用權，我地學校呢幾年爭贏咗，所以體育堂先有得學踩roller。
 
入去冇耐，果然見到小悠喺排球場邊掃地。
 




「小悠！」我即刻叫佢。
 
「阿帆！你點知我喺度嘅？」
 
「Miss崔話你俾羅凱撒捉到上堂發吽哣，真架？」
 
「係呀，英文堂嗰陣佢經過走廊，無啦啦就叫咗我出去俾咗張犯規紙我。」小悠一臉可憐咁講，英文堂嗰陣我都發緊吽哣，所以完全唔知呢件事。
 
「條友擺明因為你冇入到學生會，所以公報私仇啦…」
 




「…算啦，咁我嗰陣的確係冇聽書，佢罰我都啱嘅。」講完之後佢繼續掃地，明明地下一粒塵都冇。
 
「佢罰你掃幾耐呀？」
 
「一個鐘頭囉。」
 
我搶咗佢個掃把：「你隻手啱啱好返，等我幫你啦…」
 
呢個時候，突然一個排球飛過嚟打中我，然後有把女聲講：「校規第205條：學生不得請任何人開括號包括老師、同學及一切人士閂括號代勞校方所施行之任何形式處罰。」
 




我忍住痛擰轉背——場上打緊波嗰3條友，我認得係學生會嘅成員。
 
「…咁又點呀？代表可以掟人呀？」我對佢地怒吼。
 
頭先用波掟我嗰條八婆氣定神閒咁講：「除咗高小悠之外，呢個時段本身唔應該有其他學生喺度；你選擇得出現，就要承受被掟中嘅風險。況且，我只係提醒你唔好嘗試犯校規。」
 
「我幾時有犯校規？你頭先都識講『學生不得請人代勞』，而家係我主動要幫小悠，犯邊條校規？」我捉佢字蝨。
 
估唔到呢招真係work，條八婆明顯動搖咗一下，咩都講唔出。
 
我將個排球拋返俾佢，佢一手打開，然後一面唔gur咁走咗去。
 
另外兩個男嘅即刻叫住（應該係）佢個名：「阿雪！」
 
其中一個經過我隔離，出力睥行我：「你最好醒醒定定，如果下次俾我捉到你犯校規，我一定連埋今日呢筆同你算。」




 
「睇吓點？」
 
羅凱撒今日唔在場，呢三個望落唔好惹嘅係佢啲黨羽，尤其係嗰個叫阿雪嘅…簡直係女版羅凱撒。
 
我再次感受到，入得學生會嘅精神應該有啲問題，好彩小悠冇群埋佢地度。
 
佢地走晒之後，個場得返我同小悠。
 
「阿帆，你頭先好霸氣呀！」
 
「妖，講呢啲…」我望望出口嗰邊，佢地應該真係走咗，於是我掉低小悠手上嘅掃把：「喂，反正都冇人睇住，趁機會而家走啦！」
 
「…會唔會俾佢地發現架？」
 




「屌，邊個會發現啫？行啦，我地去幫休比買鼠籠。」講完之後我拉佢走。
 
佢一聽見休比個名，即刻雙眼發光：「好呀！」
 
望住佢嗰雙紫色瞳孔，我諗到樣無聊嘢：「係喎，呢幾日返學，羅凱撒冇問你對眼咩？」
 
「我對眼做咩呀？」
 
睇嚟佢唔記得咗自己嘅瞳色異於常人：「佢冇捉你對眼係紫色咩？」
 
小悠搖搖頭：「…冇呀。」
 
咁又係，話自己天生就係咁嘅瞳色，羅凱撒都應該吹人唔漲，唔通叫人自毀雙眼咩，哈。
 
不過，頭先小悠好似有一吓愕然，應該係我錯覺。






如果大家嫌一日兩篇唔夠喉，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/
ＬＩＮＫ都貼埋，唔係唔去呀？！