【全劇終】《我喺街執咗個失憶嘅女仔返屋企》: 遺憾

 半夜，我喺床典嚟典去都瞓唔著，就索性坐起身望住個窗。
 
床下面除咗小悠隱約嘅呼吸聲之外，仲有啲「吱吱吱」嘅聲，睇嚟未瞓嘅唔止我一個。
 
「…差啲唔記得你係夜行性動物。」我輕輕抱起喺小悠隔離跑緊轉輪嘅休比，然後帶咗佢去書枱嗰邊。
 
「…你就話有轉輪玩啫，咁我呢？成晚流流長應該點過？」
 
休比突然靜咗落嚟，好似喺度問我點解一樣。
 




我唉咗一聲，然後摸吓佢：「休比，我失戀呀。」
 
壓抑咗全日嘅情緒好似一下子湧上心臟，令我有種窒息嘅感覺。
 
「原來我爭啲會錯意，珀奈佢冇鍾意我，ig嗰張相九成九係羅凱撒叫佢post架…」
 
「…我覺得自己好似一條俾人釣緊嘅魚，兩年喇，我暗戀咗佢兩年喇…雖然始作俑者係羅凱撒。」
 
「我諗極唔明珀奈究竟鍾意佢啲咩，講靚仔又唔係靚仔，講性格…求其搵個路人都正常過佢，唔通真係貪佢有權力？不過我唔信珀奈係啲咁嘅人。」
 




我繼續對休比講：「你知唔知呀？中三下學期我咪有段時間冇返學嘅？嗰陣係得珀奈日日都會send錄音嚟同我傾計，又會同我講有咩功課要做，如果冇佢我應該一早留咗班…」
 
「算啦，你應該唔明我講緊乜架喇，放你返去跑轉輪啦。」我將休比放返喺轉輪上面。
 
「…阿帆。」眼前嘅休比突然開聲講嘢。
 
有一秒我係咁樣以為，嚇到我爭啲反櫈。
 
「…俾你嚇死，你唔係瞓著咗嘅咩？」我對身後嘅小悠講。
 




「我瞓瞓吓聽到有啲聲，咪起身睇吓咩事囉…」佢講完打咗個喊露。
 
屌，咁小悠咪見到我同休比講嘢？呢舖真係柒到甩碌：「…你由邊度開始聽到？」 
 
「我聽到你叫休比返去跑轉輪囉…」
 
我鬆一口氣，即係最羞恥嗰part佢應該聽唔到。
 
我將休比連鼠帶轉輪放返喺小悠隔離：「俾返你，我瞓喇。」
 
頭先同休比傾咗一陣，個心好似舒服咗啲，我諗起好細個（阿妹都未嚟）嗰陣都養過一隻龍貓，不過唔夠兩個月就俾佢走失咗，自此之後就冇再養過寵物。小悠喺街執到休比可能係個天想俾多次機會我彌補細個嘅遺憾。
 
諗起聽日又要返學，都係早啲瞓。






如果大家想鞭打我寫快啲，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/
ＬＩＮＫ都貼埋，唔係唔去呀？！