【全劇終】《我喺街執咗個失憶嘅女仔返屋企》: 廁所裏的喊聲（下）

望見珀奈仍然流住眼淚嘅雙眼，我先知道佢唔係收咗聲，只係忍住唔俾自己出聲。
 
「…嗚嗚嗚！！！」出咗嚟之後，佢放聲大哭。
 
我手忙腳亂咁抆咗幾張抹手紙俾佢。
 
過咗十分鐘，珀奈先有喊完嘅跡象。
 
我思考咗好耐，覺得應該搵啲嘢講：「…放心啦，頭先老師唔知你喺度。」 
 




「secret個post你有冇睇？」 
 
雖然都估到佢喊嘅原因同secret有關，但可能冇諗過佢無啦啦問，所以差啲反應唔切。
 
「…有，但係我唔信。」
 
「但係，佢地有相為證喎?」 
 
「嗰張咁嘅相叫有相為證？喂影得咁蒙你話係校長個老虔婆嚟都得架啦，總之我唔信。」
 




「咁如果我話嗰張相係真嘅呢？」 
 
其實上次去完學生會室，我已經認定幫珀奈影男友視角相嗰條粉皮就係羅凱撒，咁樣諗嘅時候secret個post應該都唔會係假。
 
所以我安慰珀奈：「…係啲人無聊啫，咁都要放上secret，張廷宇夠成日俾女飛啦，最應該上secret嗰個係佢先啱。」 
 
「…你唔覺得我係自己攞嚟咩？」
 
「自咩己攞嚟啫？鍾意一個人同佢表白又有咩錯？係羅凱撒條粉皮唔識欣賞你啫。」
 




珀奈又開始哭腔：「…佢話我好無聊，仲話由頭到尾對我都冇興趣呀！」
 
我諗起嗰日羅凱撒話乜鳩珀奈只係煙幕又盛，就覺得好嬲：「…唔好理佢啦！條友不嬲都戇戇鳩鳩架啦！你記住係佢配唔上你！唔係你襯唔起佢！」
 
可能我太激動嚇親珀奈，佢表情有啲驚訝：「你做咩咁落力鬧佢呀？」
 
「因為…」雖然呢句俾晒位我表白，但我都唔希望地點係男廁，加上太過突然我仲未有心理準備。
 
所以都係算：「因為…我同羅凱撒有仇，你尋日冇返學唔知咋，佢當住全校人面前落我面。」
 
「…吓？佢真係對你出手呀？」
 
「出手？」聽珀奈咁講，佢好似知道啲咩。
 
「…既然佢都咁對我，我唔怕話俾你聽。」珀奈索咗吓鼻：「…佢叫我接近你，然後將你所有嘢都要講俾佢知。」




 
我用咗5秒時間去消化呢句嘢。
 
「點解呀？」連我都唔知呢句點解究竟係問緊羅凱撒定係問緊珀奈。
 
「我唔知，不過我冇呃你。」
 
咪住先，即係話嗰張寫住想念你嘅ig相，都有可能係羅凱撒叫佢post架啦…
 
但見到珀奈咁嘅樣，我都唔忍心問落去。
 
「…我差唔多返去上堂喇。」珀奈啲眼淚已經乾得七七八八。
 
「哦，咁我地出去啦。」
 




「阿飯…」
 
「嗯？」
 
珀奈提醒我：「你要小心啲羅凱撒，佢對你有種近乎瘋狂嘅執著…」


如果大家嫌一日兩篇唔夠喉，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/
ＬＩＮＫ都貼埋，唔係唔去呀？！