【全劇終】《我喺街執咗個失憶嘅女仔返屋企》: 廁所裏的喊聲（上）

第二朝，小悠話唔放心休比一隻龍貓喺屋企周圍走，所以決定帶埋佢返學。
 
我冇咩所謂，只係提佢要小心羅凱撒話佢犯校規，俾佢捉到嘅話，將休比拎去人道處理都似…
 
「…總之記住唔好俾休比離開你書包。」
 
「知道！我會小心架喇。」
 
睇嚟放學要去幫休比買返個籠先得，另外仲要睇吓需要啲咩…
 




我喺電話search「如何飼養龍貓」，成個小息都喺度睇有關嘅嘢。
 
「飯！」突然俾張廷宇嚇一嚇，差啲電話都跌埋。
 
「…咩料呀？」
 
「尋日件事…我冇心架吓！你知我儲落幾多缺點架啦…咁難得咩都唔使做就有優點落袋，所以我先至表面上支持羅凱撒架咋！我心入面依然係支持你…」
 
「得喇得喇，」我示意佢停止：「咁你個優點收到未？」
 




「今朝收到喇，真係多謝晒飯爺你…」
 
「你多謝我做乜？去多謝羅凱撒啦。」
 
「又唔係咁講呀…話晒你輸咗場比賽，所以我先至…喂喂喂！」我作勢使出右勾拳，招都未出佢已經嚇到走咗去。
 
我梗係追出去，唔中返佢一槌難洩我心頭之憤…
 
不過個死仔走得快，搵咗一陣都唔見佢，於是順道去個廁所先返課室。
 




洗洗吓手已經響鐘，我拿拿淋抹乾隻手，費事又俾羅凱撒突然彈出嚟捉我痛腳。
 
點知準備出去嗰秒，最埋面個廁格突然有聲傳出嚟。
 
「…嗚…嗚。」
 
我嚇咗一跳，然後行埋去聽真啲。
 
「…嗚…嗚…嗚。」係一把屬於女仔嘅喊聲。
 
平時我遇到呢啲情況，一定有咁快走咁快；但多得小悠，我對呢類靈異事件已經免疫。
 
況且，呢把聲我點會認唔出？
 
「…珀奈，係咪你呀？」我輕輕敲門。




 
理所當然冇回應，連啲喊聲都冇埋。
 
自從上次secret個post出咗之後，珀奈都冇返學，所以呢幾日我都見唔到佢，估唔到再聽到佢把聲竟然會喺五樓嘅男廁入面…
 
「…我係阿帆呀。」
 
「係咪仲有人喺入面？」巡樓老師伸個頭入嚟問。
 
我即刻擋喺廁格門前面：「得得得，好快！」
 
佢似乎冇發現珀奈匿埋，只係提我快啲返去上堂就走咗，我檢查出面冇其他老師之後，再敲一敲最埋面嘅門：「…珀奈。」 
 
由頭先開始喊聲已經消失咗，我怕珀奈喺入面出事，思考緊點做嗰陣，廁所門終於打開。






如果大家嫌一日兩篇唔夠喉，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/
ＬＩＮＫ都貼埋，唔係唔去呀？！