【全劇終】《我喺街執咗個失憶嘅女仔返屋企》: 休比

好快到咗夜晚。
 
小悠沖完涼之後，神神秘秘拎住啲嘢同我講：「阿帆你睇！係我今日搵到架！」 
 
佢雙手一攤，係一隻活生生嘅老鼠（？）
 
「嘩老鼠呀！」我即刻彈開幾呎。
 
「佢唔係老鼠嚟架！你望真啲？」佢拎住隻老鼠向我行近。
 




「嘩！！！」
 
……嗯？
 
望清楚之後，小悠手上嘅生物又真係同老鼠有啲分別，或者應該話似一隻龍貓。
 
「…你喺邊度搵隻咁嘅野返嚟？」
 
「喺我地第一次見面嗰個垃圾房！佢好有靈性架！」
 




「係咪人地唔要掉出嚟架？有冇菌架？」我皺晒眉頭講。
 
「放心啦，我有幫佢沖涼，你試吓叫佢個名吖！佢會跳上你膊頭架。」
 
我望一望隻龍貓，個樣又幾乖嘅…
 
「…佢叫咩名？」
 
「佢叫休比！」
 




「個名你改架？不過是但啦，」我對小悠手上隻龍貓叫咗幾吓：「休比！休比！過嚟我度！」
 
休比聽完之後果然有反應，由小悠嘅手跳到我隻手上面，再一路爬上我膊頭。
 
「真係得架！」我興奮大叫。
 
「都話架啦！我可唔可以養佢呀？」
 
「…可以，呢度又冇話唔俾養龍貓。」見到小悠咁開心，我都費事要佢失望。
 
佢抱住休比，對我笑：「多謝阿帆！咁我帶佢食嘢先！」
 
小悠喺書包摷咗幾包糧出嚟，睇嚟早有準備。
 
「休比休比！我地食嘢喇…」




 
望住小悠坐喺梳化前餵休比食嘢，我自言自語咁講：「原來你鍾意龍貓…」
 
「或者啦，第一眼見到休比之後，我就好鍾意佢。」
 
我突然諗到啲好重要嘅野：「…咁你以前會唔會係個有養寵物嘅人呢？」我指嘅係佢失憶之前。
 
小悠諗咗一陣，然後攤開手表示唔知道。
 
我將頭先嘅想法偷偷寫咗落本簿度——雖然近排發生咗幾多事，但我冇忘記答應過小悠要幫佢嘅嘢；而要知道小悠喺邊度嚟，我覺得必須要了解佢係一個點嘅人。
 
「你寫緊咩呀？」小悠哄埋嚟八掛，我即刻收埋本簿。
 
「關你咩事？你去餵鼠啦。」呼…差啲俾佢發現我做埋啲咁on9嘅嘢。