【全劇終】《我喺街執咗個失憶嘅女仔返屋企》: 學生會挑機篇：阻止的理由

返屋企路上，我不停回想頭先羅凱撒叫小悠加入學生會嘅畫面，愈諗愈嬲。
 
條友一定係有咩企圖，至會俾入學一日嘅小悠加入學生會。
 
究竟佢盤算緊啲咩…？
 
冇幾耐之後，小悠都返咗屋企。
 
「阿帆你頭先去咗邊呀？又話一齊返屋企，又唔等埋我…」佢將書包放咗喺梳化。
 




我唔答佢，繼續喺枱做功課。
 
佢拉開櫈，坐喺我隔離：「阿帆？」
 
一諗到佢已經係學生會嘅人，我個腦就再諗唔到其他野，於是索性合埋本簿。
 
「…我有嘢同你講。」
 
「咩事呀？」
 




「不過，我要同你道咗歉先，因為件事其實我都有份…」
 
「你講緊咩呀？」
 
雖然而家講咩都冇用，但至少我要俾小悠知道羅凱撒嘅真面目：「你知唔知頭先嘅比試，羅凱撒用咗你嚟做賭注？」
 
佢如我所料唔明我講咩：「即係咩意思呀？」
 
「羅凱撒話如果佢贏嘅話，我就唔可以阻止你加入學生會，我贏嘅話就相反，所以呢一場其實係建基喺你身上嘅比賽。」
 




「…所以呢？」
 
「你唔覺自己俾人擺上枱嘅咩？」
 
小悠擰頭，過咗一陣講：「不過你頭先話…佢贏嘅話你就唔可以阻止我加入學生會，即係…你唔想我入學生會呀？」
 
雖然我一直認為入唔入係小悠嘅自由，但問心嗰句，我點會想佢入？
 
「唔想。」
 
「點解呀？」
 
每次諗起羅凱撒喺學生會室講嘅嘢，我都隱約有種不祥預感。如果頭先我有贏到嘅話，就可以搞清楚到底佢知道小悠幾多，但可惜我冇贏。
 
到底佢嗰句係咩意思？乜野叫「有冇諗過小悠係點嚟」？




 
我怕俾羅凱撒再接近小悠嘅話，佢唔知會對小悠做啲咩。
 
「…你先返咗兩日學，連課室都未分得清想學人入學生會？」最後，我求其帶過。
 
「咩呀？你咪帶我行過一次囉，我記得架！」
 
「咁圖書館喺幾多樓呀？你答嘞。」
 
「四樓…？吖唔係，五樓！」
 
我嘆口氣：「係二樓…」
 
「…係二樓咩？」
 




「今舖真係死得…俾個連圖書館都唔知喺邊嘅學生代表全校…」我心情開始放鬆，決定暫時唔諗。
 
「…唔知圖書館喺邊又有咩問題，反正我都冇加入學生會。」
 
我差啲以為聽錯：「你冇加入學生會？」
 
「冇呀，我覺得做學生會太辛苦～」
 
「頭先咁嘅氣氛，我以為你一定會應承羅凱撒添…」
 
「你仲好講！本來我諗住你會帶我走架，點知一轉頭就唔見咗人…」
 
「哈哈…」我傻笑兩聲，睇嚟頭先嘅擔心暫時係多餘嘅。
 
不過，小悠冇加入學生會，真係太好喇。