【全劇終】《我喺街執咗個失憶嘅女仔返屋企》: 學生會挑機篇：對決結果

羅凱撒起步冇耐，就大幅拋離咗我，啲動作順到話佢隻鞋裝咗外掛我都信，雖然我接二連三繞過晒啲障礙物，但要追上佢睇怕要再花啲氣力。
 
場邊嘅叫囂聲不停轟炸，睇嚟大家都覺得個優點袋袋平安。
 
好快過咗半個圈，羅凱撒喺我前面大概5個身位，仲有餘裕擰轉頭對我chok樣。
 
不過，身體動作係呃唔到人——比起一開始，羅凱撒嘅腳步明顯變得吃力，我正正等緊呢一刻嘅到來。
 
由頭先開始，我一直保留體力，為嘅就係最後50米一舉超越佢。
 




我繞過最後幾個障礙，進入直路階段後開始發力，同羅凱撒嘅距離都愈嚟愈近。
 
就喺經過小悠身邊嘅瞬間，我聽到來自佢嘅打氣聲：「加油呀阿帆！」
 
呢吓打氣好似俾咗力量我咁，我將全部集中力放喺眼前嘅終點，然後加速到極限——
 
幾乎同一時間，我同羅凱撒衝過終點，不過我好肯定，頭先我快佢少少。
 
「比賽完畢！」
 




我抖順條氣之後，對場邊嘅小悠比咗隻手指公，個傻妹開心到差啲跳起。
 
「而家宣佈比賽嘅勝利者——」
 
張廷宇個死仔一定好後悔支持羅凱撒，一諗到呢度，我忍唔住笑咗出嚟。
 
「5A班羅凱撒同學！」
 
場邊傳出舖天蓋地嘅歡呼聲，甚至有人出嚟抬起羅凱撒，懶有節奏咁嗌：「會長！會長！會長！」
 




我呆咗兩秒之後，衝過陳sir度理論：「陳sir！頭先我好肯定我係快過羅凱撒過終點。」
 
點知佢眼尾都唔望吓我：「我對眼望到係羅同學快一步衝過終點。」
 
「點會呀？你地有冇錄影？有冇計時？」
 
「你而家喺度質疑我嘅判斷？」
 
「唔係，我只係覺得單憑你一句就斷定贏嗰個係羅凱撒，對我好唔公平。」
 
「總之我係比賽嘅評判，我話佢贏就係佢贏，明明係你技不如人，而家輸咗找我晦氣？你咁多時間不如返去練多啲先啦。」講完之後陳sir急急腳走咗，我想拉住佢都冇用。
 
所有目光都落喺羅凱撒身上，除咗小悠之外——
 
「阿帆！個阿sir有冇搞錯呀？明明我都見到係你快啲！」




 
「算啦，可能真係羅凱撒快啲。」我決定放棄爭論，反正呢間學校入面，老師只會幫住學生會班人。
 
「唔係咁架！個比賽應該係你贏架！唔得，我去搵陳sir！」小悠準備走嗰陣，我拉住咗佢。
 
「由佢啦，我地返屋企喇。」
 
「大家！我想趁呢個咁齊人嘅時刻去做一件事！」我同小悠嘅對話俾羅凱撒打斷，佢慢慢走近我地，其他花生友都湧埋過嚟，隔開咗我同小悠。
 
「高小悠，喺最初遇見你嗰一刻起，我就知道你係我一直搵緊嘅人——」
 
講到呢度，班花生友突然起哄，就好似電視劇啲老套求婚畫面咁。
 
羅凱撒示意花生友暫停，然後對小悠伸手：「你可唔可以加入學生會？」
 




「應承佢啦！應承佢啦！」
 
我俾花生友迫咗出場邊，小悠好似有啲不知所措，但臉上掛住笑容。
 
又係嘅，佢對於加入學生會呢回事，不嬲都冇抗拒。
 
但唔知點解，我唔想聽到小悠親口答應。
 
喺班人起哄緊嘅同時，我偷偷離開咗籃球場，然後返咗屋企。