【全劇終】《我喺街執咗個失憶嘅女仔返屋企》: 學生會挑機篇：打賭（下）

 
返課室途中，有好幾條友對我投以好奇夾雜同情嘅目光，從佢地嘅表情我知道佢地嘅潛台詞係：
 
你幾好野（不自量力）吖，竟然同學生會長單挑。
 
明明我先係受害者……
 
「咦，飯爺返嚟喇喎。」張廷宇一路食燒賣一路講，「我咪叫咗你唔好挑學生會長機，你係都唔聽。」
 
「我要更正，而家係佢挑我機，唔係我挑佢。」




 
「是但啦，反正你都成為咗史上第一個同學生會長單挑嘅學生。」
 
小悠聽到佢咁講，又學人講埋一份：「阿帆你真係犀利。」
 
睇嚟小悠唔知自己先係呢場挑機嘅禍端，當然我都唔希望佢知。
 
「話時話你地聽日鬥咩？」
 
張廷宇一講我先醒起羅凱撒淨係挑機，但冇講要挑咩，不過由地點係籃球場嚟睇，應該走唔甩係運動…




 
「你冇睇通知咩？佢話籃球場等吖嘛，我估鬥籃球掛？」我猜測。
 
「原來阿帆你鍾意打籃球？」今次到小悠問。
 
「你係點樣得出呢個結論…」題外話，先返咗半日學，但小悠嘅智商唔知乜野原因好似以幾何級數下降緊（從佢嘅對答中得出呢個結論），我開始諗究竟帶佢返嚟係咪一件正確嘅事。
 
算啦…或者佢適應咗之後，會正常返啲。
 
「點都好啦，而家全校都知呢件事，你冇得走架喇，你諗吓點樣輸得冇咁難睇好過啦。」張廷宇講完之後，我一手搶咗佢袋燒賣。




 
「喂！」
 
「阿帆，你睇吓！」小悠俾部電話我睇（部電話佢尋日自己出嘅，聲稱抽獎抽返嚟，咁樣睇小悠可能意外地有抽獎運），原來學校secret喺ig搞咗個投票，買我同羅凱撒邊個贏，結果當然係佢大幅拋離。
 
「屌。」我搶咗小悠部電話。
 
「喂呀！我有投你贏架！」
 
「聽講你今日第一日返學咋喎？幾時識得上埋呢啲on9 ig page？」
 
「啱啱張廷宇教我嘅！」
 
我將憤怒嘅視線移向張廷宇，佢即刻口窒窒咁講：「吖……都就夠鐘上堂喇可？我返埋位喇！」
 




雖然俾佢用最正當嘅藉口走甩咗，不過都算賺咗佢袋燒賣，我亦行返埋位度準備上堂。
 
上緊堂嘅時候，目光好自然望向小悠，一種唔甘心嘅感覺好似有時差一樣而家先由心底慢慢湧上，我諗起今朝羅凱撒嗰副嘴臉，真係當正自己係呢間學校嘅皇帝一樣。
 
如果，我係話如果，我聽日認真同佢較量，又一下唔覺意咁贏咗佢，一來可以挫吓佢銳氣，二來可以令睇死我會輸嗰班人收皮，三來話唔定可以知道更多關於小悠嘅事……
 
不過面對羅凱撒呢個各方面能力都近乎完美嘅學生會長，睇嚟唔出陰招都幾難贏到…