【全劇終】《我喺街執咗個失憶嘅女仔返屋企》: 學生會挑機篇：打賭（上）

聽到小悠個名，我動搖咗一吓。
 
學生會知道有插班生呢件事唔出奇，問題在於羅凱撒點解會對小悠有興趣。
 
佢好快解答咗我：「審查入學申請表嘅時候，我發現咗一個好有趣嘅地方。」之後佢拎咗張A4紙出嚟，上面應該係小悠嘅字跡：「我真係唔敢想像，你地兩個居然住埋一齊。」
 
我望吓張入學申請表，小悠喺地址嗰欄寫咗我屋企。
 
「…佢係我親戚，邊條校規指明親戚唔可以一齊住？」我用返對張廷宇嗰個大話。
 




「哼，前提係佢真係你嘅親戚。」之後，羅凱撒稍微弓前，雙手合十咁放喺枱面，講咗一句意味深長嘅說話：「呢個女仔嘅來歷，你真係清楚？」
 
冷氣風口位突然吹出一絲冷風，我背脊一涼。
 
「我嘅意思係，你有冇諗過高小悠呢個人係點嚟？」
 
佢講完之後，我呆咗5秒。
 
如果頭先嗰句唔係試探性質，又唔係佢犯中二作出嚟嘅話，佢可能知道某啲關於小悠嘅嘢。
 




我掌握嘅實在太少，再講落去我怕會露出更多破綻，所以都係走為上著：「…如果你唔係罰我嘅話，咁我返課室先。」
 
羅凱撒一邊奸笑，一邊簽咗張禁用小食部嘅紙俾我：「好好思考我頭先講嘅說話。」
 
我接過佢手上嘅紙，睇嚟之後個禮拜我都冇得帶小悠去小食部買嘢食。
 
臨走之前，佢喺我身後講咗一句：「惡意嘅連鎖總係喺形成之後，愚蠢嘅人類至會後知後覺…」
 
「痴線…」我細聲講咗句。
 




可能頭先嘅敵意係我錯覺，條友見我同小悠個地址一樣就求其鳩噏，話唔定根本係精神病重症，所以學校先就晒佢。
 
走唔夠兩步，身後再度傳嚟佢把聲：「講多樣嘢你聽，陣間我會代表POWER，向高小悠發出加入學生會嘅邀請。」
 
「你究竟想點呀？」麻煩放過我啦…
 
「如果你想插手呢件事嘅話，得，我俾個機會你：聽日放學籃球場等，我地嚟一場比試，你贏到我嘅話我就放棄邀請高小悠加入學生會；但如果你輸咗嘅話，就唔可以再過問呢件事。」
 
小悠入唔入學生會其實係佢自由，我本來就冇權過問，但俾羅凱撒咁樣挑一挑機，忽然挑起咗我好奇心。
 
「不如咁啦，如果我贏咗嘅話，你解釋頭先嗰兩句嘢。」我指佢提及小悠來歷同佢點嚟嗰兩句。
 
佢用中指托一下眼鏡：「有意思，我應承你。」 
 
到咗下晝，小悠果然好興奮咁同我講有人請佢入學生會。




 
「咁你想唔想入呀？」
 
「唔知呀，我連個會長都未見過。」
 
我冷笑一聲：「唔見好過見，我驚你見完佢之後俾佢啲中二病傳染。」
 
「係喎，頭先學生會長搵你做咩呀？」
 
「冇，佢話我曠課，罰我一個禮拜冇得用小食部啫。」關於小悠同埋輸賭嘅事，我冇提起。
 
「曠課？你幾時有呀？」
 
我嘆口氣：「冇呀，開學之前嗰啲垃圾補課渣嘛。」如果俾小悠知道我曠課係為咗調查佢嘅閃靈現象，肯定有排向我道歉。
 




呢個時候，電話收到張廷宇嘅訊息。
 
佢問我睇唔睇到學校app啱啱個推送通知，因為我一早熄晒學校app嘅權限，所以咩都唔會收到。
 
至於學校app係咩嚟，就係一個校方同學生溝通嘅途徑，基本上有咩都會喺上面宣佈，而學生會梗係有權向全校發放通知。
 
所以，張廷宇講嗰個推送通知應該係由羅凱撒發出，宣佈聽日我同佢嗰場所謂嘅比試，如果唔係張廷宇唔會特登咁問我。
 
我打開學校app，果然係咁。
 
而且，佢仲要求全級中五都要嚟做觀眾，否則每人一個缺點。
 
佢咁做無非係覺得自己贏硬，想喺咁多人面前落我臉，滿足自己嘅虛榮心，佢可能唔止係個中二病人，仲係個心理變態。
 
講開又講，今屆學生會好似係破天荒連任，所以今年唔使再選，我搏命諗返上年選舉嘅情形，偏偏唔記得自己有冇份投票俾POWER，如果有嘅話，真係想坐時光機返去叫中四嘅自己唔好投票俾呢個白卡佬。