【全劇終】《我喺街執咗個失憶嘅女仔返屋企》: 學生會挑機篇：出茅招

放學之後，我偷偷跟住羅凱撒，諗住睇準時機跣佢一鑊，等佢聽日去唔到比試。
 
本來想叫小悠自己返屋企先，但佢唔知走咗去邊，應該又落咗小食部食嘢；加上呢啲咁唔見得光嘅事本來就應該一個人做嘅，所以我決定搞掂先去搵小悠。
 
羅凱撒一放學就入咗學生會室，我喺七樓捕咗半粒鐘都未見佢出嚟，慌佢唔係懶係多公務，實情喺入面hea咩…
 
冇幾耐終於有動靜，學生會室嘅大門被打開，但出嚟嗰個唔係羅凱撒。
 
係小悠。
 




我諗緊咩原因佢會由裏面走出嚟，然後諗起今朝羅凱撒叫佢加入學生會，應該都係講詳情之類。
 
但講詳情都唔使半粒鐘吓嘩？
 
唔理咁多，叫住佢先：「小悠！」
 
為免驚動會室入面嘅人，我唔敢太大聲。
 
好彩佢聽到：「阿帆！點解你會上咗嚟嘅？」
 




「殊！細聲啲呀！」我示意佢過嚟，然後解釋：「我喺度示範緊乜野叫做喺能力範圍之內將自己嘅贏面提升到最高。」
 
我嘅計劃好簡單——倒灘水喺學生會門口，等羅凱撒一唔覺意跣低咪得囉。
 
得嗰半日時間諗係咁上下啦。
 
「你講聽日同學生會長嗰場比試呀？」佢諗咗一陣，好似明白我想點咁，然後制止我：「唔得架，咁咪即係出茅招。」
 
「佢地學生會平時都出唔少啦，記住喺不平等情況下成立嘅所謂比試，係唔存在出茅招呢樣野，」我懶型咁講咗句，然後命令佢：「總之，你幫手睇吓條友幾時會出嚟！你夠膽講出去嘅話以後冇飯食！」
 




大概係呢招起咗作用，小悠好乖咁幫我睇水，我就趁機避開CCTV，去廁所裝水倒喺學生會門口。
 
「我地匿埋一邊睇。」搞掂之後我拉咗佢去死角位。
 
「係咪真係得架？」佢半信半疑咁問我。
 
「條友咁中二，行路一定唔會望地下架啦，等佢出嚟就拎定花生。」對於整鬼學生會長呢件事，我滿有信心。
 
然後聽日佢就含淚宣佈投降；我不費吹灰之力就挑贏大名鼎鼎嘅學生會長——完美。
 
而家就差佢出嚟。
 
等緊嗰陣，我問小悠：「頭先喺入面傾咩傾咁耐呀？」
 
「佢問我對學校有咩抱負、加入學生會之後會作出咩貢獻、對於嚟緊嘅活動有咩意見，」小悠好仔細咁講晒出嚟。




 
「嗯，嗯。」我一路聽一路點頭。
 
「同埋覺得阿帆你份人點囉。」
 
我嚇到差啲仆親：「呢個問題同加入學生會有咩關係？」
 
「佢話入得學生會就要對全校學生有基本了解，所以先會問呢個問題喎。」
 
係鬼…羅凱撒分明喺度玩嘢，都係叫小悠小心啲好。
 
「…呢個學生會長，冇咩必要都唔好同佢來往。」
 
「但係如果我入咗學生會，之後一定會同佢成日見面架喎…」
 




「你決定加入學生會？」我問。
 
小悠諗咗一陣：「唔知呀，我仲考慮緊…」
 
雖然唔想小悠同羅凱撒有咩瓜葛，但入唔入學生會係佢個人決定，我都冇咩資格出聲。
 
所以，我冇再講嘢。
 
我地喺角落匿咗兩粒鐘，依然唔見羅凱撒出嚟，我開始有啲奇怪。
 
「冇理由格？明明睇住佢入去架喎，就嚟六點都唔走？條友真係喺學校瞓呀？」我自言自語。
 
「會唔會係佢偷走咗？或者入面有暗門？」
 
「佢冇理由知我想整佢架？」我百思不得其解。




 
「……我好肚餓呀，可以返去食野未呀？」
 
我望望隻錶，而家五點十一，個傻妹陪我企咗兩個鐘。
 
「唉怕你呀，返去喇返去喇。」
 
然後，好快到咗聽日。