【全劇終】《我喺街執咗個失憶嘅女仔返屋企》: 阿妹

我用力拍阿妹房門：「你發夠脾氣未？開門！」
 
拍咗一陣都冇人應，我決定用後備匙爆門。
 
「阿帆你冷靜啲啦…」小悠喺一邊講。
 
「我好冷靜，你自己吹住頭先，陣間聽到咩聲都唔好理。」我一路開鎖一路吩咐小悠。
 
「哦…」
 




我三兩吓手勢就開咗阿妹嘅門鎖，佢即刻撳住道門唔俾我入去，我唯有同佢鬥力。
 
「出去呀！邊個俾你入嚟呀？」
 
「我唔同你講清楚今晚就唔瞓教。」我稍一用力，成功推開阿妹房門，跟手即刻閂門，然後上鎖。
 
阿妹即刻縮到角落頭：「我話阿爸阿媽知呀！」
 
「你話吖！明明係你發脾氣在先，睇吓佢地幫邊個？」
 




「明明係你無啦啦帶人返嚟住，又唔同我講聲！」
 
「我咪講咗，佢只係住住先架咋。」
 
「住住先即係住幾耐呀？」阿妹依然好激動。
 
呢個問題，我自己都唔知，所以靜咗落嚟。
 
我坐咗喺阿妹床邊，望住佢間房四面牆，先發覺原來對上一次入嚟已經唔知係幾時。
 




阿妹冇再拗落去，伏咗喺書枱前面。
 
「總之你信我啦，我同小悠嘅關係唔係我之前講嘅咁，你以為嗰啲嘢我地更加冇做過。」
 
先唔講如果同阿妹坦白佢一定唔會信；重點係喺我眼中，阿妹係一個品行端正嘅模範生；我唔想，亦都唔容許有任何有違日常嘅超現實走入佢世界。
 
「…晴晴？」
 
回應我嘅係一段斷斷續續嘅抽泣聲。
 
我走近書枱，靜靜地注視佢。
 
記憶中，阿妹好少喺我面前喊，我以前會認為阿妹做咩都咁叻，根本冇喊嘅理由；但呢一刻我忽然醒覺，一路以嚟我都覺得所有嘢係理所當然：阿爸阿媽唔喺屋企，阿妹扮演佢地嘅角色；我開學前入院，阿妹放棄練稿都要買嘢俾我食；我帶小悠返嚟住，唔需要通知佢一聲…或者，佢承受嘅一早超越我想像。
 
但係我做人阿哥嘅，居然連俾機會個妹扭吓計都做唔到。




 
我隻手懸喺半空，猶疑咗一陣之後，慢慢掃一下阿妹嘅頭髮。
 
阿妹冇避開或者反抗，只係繼續喊。
 
「對唔住呀，要你忍咗咁耐。」
 
冇幾耐，阿妹好似喊完，佢用衫袖捽一捽對眼，恢復平靜咁同我講：「出去。」
 
我有啲反應唔切，畢竟頭先嘅氣氛咁溫馨，轉個頭佢又用返平時嘅語氣趕我走。
 
「出去呀！」
 
「…okok。」
 




「仲有！我講咗幾多次唔好再咁叫我呀？」 
 
頭先一時口快叫咗阿妹個名，不過有樣嘢唔係好明，明明以前我一直叫佢晴晴，係早兩年開始，阿妹突然禁止我再叫佢呢個名。
 
可能人大咗，覺得叫疊字太低能掛？（當然冇嘢可以阻止我認為呢個名好可愛，好襯晴…唔係，係阿妹）
 
「頭先一時唔記得，以後我會注意架喇。」我乖乖道歉。
 
返到出廳，搵勻成間屋都唔見小悠。
 
我心裏又升起不祥預感…屌，佢唔係好似膠劇情節咁，因為唔想打擾我同阿妹，留張字條又走咗去呀？
 
好彩兩秒後嘅門鐘聲話俾我聽係我諗多咗。
 
小悠唔知喺邊買咗袋雪條返嚟。




 
「阿妹冇嘢吖嘛？」
 
我擰頭：「頭先同佢傾咗一陣，佢好好多喇。」
 
「咁就好喇。」
 
「做咩有袋雪條？買俾我食架？」我準備搶。
 
點知小悠一嘢避開：「我係買俾阿妹食架。」
 
「你又知佢一定鍾意食？」雖然我都唔肯定，但阿妹應該對甜品冇咩興趣。
 
「唔知呀，頭先我問店員阿妹發嬲嗰陣應該買咩氹返佢，佢指咗呢樣嘢俾我。」
 




真係唔知應該由邊度開始吐槽。
 
不過，都算充滿小悠嘅風格…嘅（？）