【全劇終】《我喺街執咗個失憶嘅女仔返屋企》: 折騰一日之後…

之後我帶咗小悠去睇醫生，醫生幫佢照咗x光話佢只係輕微扭傷，抖幾日就會好返。
 
順帶一提，張x光片我都有份睇，正常過唔正常。
 
我再一次陷入思考，到底小悠佢屬唔屬於人類。
 
折騰咗差唔多一日，我地終於返到屋企。
 
阿妹呢個時間一定已經返咗嚟，但我撳極門鐘都冇人應，最後要用鎖匙開門。
 


一返入屋，我同小悠就攰到攤咗喺梳化。
 
佢喺我隔離用力伸咗個懶腰：「好攰呀，阿帆你沖涼未呀？」
 
「…準備去。」我求其答，目光忍唔住被小悠身上玲瓏浮凸嘅曲線所吸引——然後，又自不然諗起晏晝喺後山嗰種奇怪嘅心動感覺。
 
為咗唔好亂諗，我去沖咗半粒鐘凍水涼，沖完之後頭腦清醒咗好多。
 
我無無聊聊打開ig睇，原來珀奈今日去咗野餐，仲post咗一系列男友視覺嘅相。我喺每幅相下面都俾咗like，望住珀奈相入面嘅笑容，心頭有一種快要溶化嘅感覺，果然，晏畫喺後山我只係咁啱講咗句極度羞恥嘅說話，至會對小悠產生咗奇怪嘅感覺。
 


冇幾耐小悠都沖完涼，坐咗喺梳化前面吹頭髮；我就繼續翻睇珀奈ig。
 
吹吹吓頭，小悠突然放低咗個風筒：「痛…」 
 
我停止手上嘅動作：「你搞唔搞得掂呀？」
 
可能風筒太嘈，小悠好似聽唔到。我諗起醫生叫佢要減少操勞，就一手拎起個風筒。
 
「我幫你啦。」我喺小悠耳邊講，以防佢聽唔到。
 


小悠好似縮咗縮，擰轉面唔知講咗句乜野。
 
我熄咗個風筒：「你講咩話？」
 
「我話你突然間喺人耳仔邊講嘢，想嚇死人咩？」
 
「哈哈，」我假笑兩聲，「乜你係人咩？」
 
話時話，可能太耐冇掂過女仔頭髮（對上一次已經係初中嗰陣摸阿妹個頭），手感同平時自己吹頭嗰陣好唔同，小悠啲頭髮摸起嚟好柔順，混雜一陣洗頭水嘅香味…
 
突然「嘭」一聲，嚇到我差啲彈起。
 
「你地嘈完未呀？吹咩頭吹咁耐呀？」阿妹喺房走出嚟。
 
「阿妹！」小悠同佢揮揮手，「原來你喺度架？頭先做咩唔開門呀？」


 
睇嚟我接小悠嚟住之前，應該教吓佢閱讀空氣先。
 
阿妹一臉唔耐煩：「唔該你地靜少少，我喺入面溫緊書。」然後就返咗入房（例牌嘭門）。
 
小悠擰轉面問：「我地係咪太嘈呀？」
 
「你！拎住！」我將手上嘅風筒塞俾小悠，叫佢自己吹住先。
 
咁落去唔係辦法，睇嚟我要適當行使阿哥嘅權利（即係擺款）。