【全劇終】《我喺街執咗個失憶嘅女仔返屋企》: 終於開學

無驚無險到咗星期一，今日係小悠第一日返學，都係我第一日返學。
 
但因為小悠係插班生，所以唔可以同我一齊入課室。（順帶一提我地同班）
 
班主任課嗰陣，喺Miss崔（班主任）介紹之下，小悠慢慢行入課室。
 
班房隨即出現交頭接耳嘅討論聲，我坐喺靠窗尾二個位，只係見到幾個飢不擇食嘅狗公對小悠投以饑渴嘅目光。
 
「小悠你就坐喺第一行第一個位啦！」Miss崔指一指門口講。
 




我望望門口嗰邊，小悠個位剛好與我形成一條對角線，而坐喺佢後面、隔離同斜後面嘅就係頭先眼甘甘望住佢嗰幾隻厹。
 
小悠一坐低就同佢地打招呼，而佢地緊係食住上，乘機撩小悠講野。
 
我喺五米之外目擊呢一切，只係覺得一肚火。
 
幾經辛苦捱到小息，我藉啲意搵小悠一齊去小食部買嘢食，一聽到有嘢食佢果然兩眼發光，即刻乖乖跟我落樓。
 
「乜學校都有嘢食賣架？」小悠問咗一句廢話。
 




「有，嗰個地方叫小食部，跟我讀一次：小、食、部。」我一時興起咁玩。
 
佢竟然將我嘅鳩噏當真，跟住讀：「小！食！部！」
 
我開始懷疑，小悠失憶之前會唔會係個智力有問題嘅人士。
 
「不如陣間我帶你行一次學校啦。」落樓梯嗰陣，我提議。
 
「好呀！呢度啲門全部都一模一樣，都分唔清邊度打邊度。」小悠好興奮咁答。
 




「總之你記住，我地班房喺5樓，出面寫住5E嘅就係嘞。」我教佢認住我地嘅班房，呢個時候張廷宇突然出現喺我地面前。
 
「飯爺，你真係唔聲唔聲…」
 
「乜野呀？」我有預感，佢嚟搵我係為咗啲麻煩嘅話題。
 
「收埋條女喺屋企不特止，仲要帶埋返學校，邊夠你玩吖？」講完佢扮野拍咗幾吓手。
 
我解釋到唔想解釋，決定扯開話題。
 
「你個芝芝呢？又話好返嘅？」
 
「芝芝喺音樂室練緊choir，身為男朋友點可以打擾佢？」
 
「咁你去音樂室門口等佢啦，唔好嚟搵我麻煩…」




 
「幾時有話搵你？我嚟係搵小悠嘅。」
 
「你搵佢做咩呀？」
 
張廷宇無視我，懶係親切咁同小悠講：「小悠～嗰日真係唔好意思呀，累你整親隻手，你好啲未呀？」
 
「嗯，醫生話抖幾日就會冇事，你呢？你嗰日都好似跌得好傷喎？」
 
「我晨早冇事啦！不過你記唔記得嗰日…」
 
「嗯！我話只要你肯落返嚟，我就慢慢同你解釋吖嘛！」
 
「太好喇！你仲記得！」
 




已經搞清楚張廷宇嘅目的，原來係嚟八掛嘅；最令人吐血嘅係小悠居然高度配合佢。
 
「咁你同阿飯究竟咩關係啫？」張廷宇追問。
 
「佢係…」喺我準備搶答嘅同時，我見到小悠都好似想開口，於是即刻用眼神叫停咗佢，示意由我嚟解釋。
 
如果唔咁樣做嘅話，90％會出現大家同步講野但證供不一嘅老套情節。
 
即係我講「佢係我朋友」嘅同時；佢同一時間講「我係佢親戚」，然後大家交換句野又再柒多次呢類劇情咁上下。
 
小悠明白我嘅意思，乖乖合上嘴巴。
 
「小悠係…我親戚個女。」我對張廷宇講。
 
「親戚個女？你幾時多咗個親戚我唔知架？」我父母兩邊都冇兄弟姊妹，所以冇乜親戚。




 
「移民咗好耐，呢幾日先返嚟。」我求其作。
 
「哦哦，你咁講嘅我咪信住先囉。」張廷宇語氣中充滿懷疑嘅態度，我不禁思考我講大話嘅技巧係咪差成咁。
 
「唉唔玩嘞，我嚟搵你係有大鑊野同你講。」張廷宇突然收起嬉皮笑臉。
 
「咩大鑊嘢呀？」連小悠我都帶埋返學校，我相信都冇咩大鑊得過呢樣。
 
張廷宇打開ig個學校secret，俾咗入面一個post我睇：「自己睇啦。」
 
我用咗20秒睇晒成個post，然後用咗40秒呆喺原地。
 
「喂？你唔使咁誇呀？」張廷宇喺我眼前揮手。
 




「咩事呀？」然後小悠都睇咗個ig post。
 
「一句講晒，你搵唔搵條契弟隻揪？」張廷宇問我。
 
「邊個條契弟呀？係咪post入面講嗰個學生會會長呀？」小悠一臉天真地問。
 
至於個post講咩，我簡單解釋一吓：有人目擊到珀奈向學生會會長告白，然後當場被狠狠拒絕。
 
「呢啲咁嘅page係人都可以上去鳩噏，你覺得我會信？」我裝作冷靜咁講。
 
「唔係喎，條友post埋圖喎…雖然蒙到pk。」
 
「你都識講蒙到pk，你又知一定係佢嚟嘅？」雖然表面死撐，但以我暗戀咗佢兩年嘅資歷，要分清相入面嘅係咪佢其實唔難。
 
我諗我要收返上幾行講過嘅說話，今次真係好Ｌ大鑊。