【全劇終】《我喺街執咗個失憶嘅女仔返屋企》: 奇怪的心動感覺(下)

「佢話唔係喎，咁你地究竟係咪同居呀？」張廷宇問小悠。
 
呢個時候，小悠對張廷宇伸出右手：「你俾隻手我吖，返落去之後，我再慢慢同你解釋。」
 
出乎意料，張廷宇聽完之後竟然真係握實咗小悠隻手。
 
「阿帆！我捉到張廷宇隻手喇！」
 
然而，每當稍一鬆懈，事情往往就會向老套嘅方向發展。
 


「呀！！」兩吓慘叫聲之後，小悠連同張廷宇一齊喺嗰棵兩米高嘅樹上面跌咗落嚟。
 
「你地點呀？」我即刻衝過去問，好彩佢地應該都冇受傷。
 
只係小悠用女上男下嘅姿勢坐咗喺張廷宇身上。
 
「你有冇事呀？」小悠問張廷宇。
 
「冇…冇事。」
 


「你記住以後唔好做傻事喇，呢個世界仲有好多人珍惜你架。」
 
「係囉，你死咗咁我點呀？」我附和。
 
小悠慢慢起身，掃一掃身上嘅灰塵，然後表情突然變得痛苦：「痛…」
 
張廷宇九秒九彈起身：「你點呀？」
 
「…可能跌落嚟嗰陣，扭親隻手。」
 


「不如我同你去睇跌打啦？」
 
「唔使呀，係都你去睇啦，咁高跌落嚟。」我代小悠回答。
 
「你啱，」張廷宇拍拍我膊頭，又同小悠講：「既然我地兩個都咁高跌落嚟，不如一齊去睇啦？」
 
「er…」
 
「佢而家唔得閒，晏啲我會帶佢去架喇。」我將小悠拉去我後面，因為從張廷宇突如其來嘅熱情以及我識咗佢五年呢兩方面嚟睇——唔好俾我估中，佢睇中咗小悠。
 
「你都話佢唔係你條女，關你撚事呀？」
 
「我地的確唔係拍緊拖，不過…」我諗緊應該點樣解釋：「總之如果你地要去，我陪埋你地去。」
 
「你又冇跌親，跟埋去做乜？」張廷宇繼續死纏爛打。


 
「因為…因為…」我諗緊點樣用最簡單易明，又唔會嚇親人嘅方式解釋閃靈現象俾張廷宇聽。
 
諗咗一陣——除咗呢個羞恥嘅講法之外，我真係諗唔到，我以微乎其微嘅聲線講：

「因為佢唔可以離開我…」
 
點知講到一半，張廷宇電話響：「喂？係咪芝芝呀？」30秒之後，佢開心到跑過嚟同我握手：「芝芝話佢啱先出錯post，佢唔係想同我分手呀！」
 
「咁…咁咪好囉。」
 
「我人生充滿返希望喇！喂唔同你地講住喇，我約咗芝芝！bye！」講完之後佢就衝咗落山。
 
我心入面對素未謀面嘅芝芝講咗句多謝，多得佢及時打嚟，先令張廷宇不至於聽到我頭先嗰句嘢。
 


但係，我似乎唔記得咗身後仲有另一個存在…
 
「阿帆。」呢個距離下，小悠把聲聽起嚟更加清楚。
 
「咩事？」我即刻企前兩步，拉開同佢之間嘅距離。
 
「頭先嗰句，你可唔可以講多次呀？」
 
「…邊句？頭先我有講嘢咩？」
 
我一直背對小悠，怕俾佢見到我而家臉上嘅表情。
 
冇幾耐，背後又傳嚟小悠嘅聲音：「算啦，反正我頭先都聽得好清楚。」
 
「…頭先一時情急我先至會講嗰句架咋，你唔好誤會呀。」


 
突然一陣恥笑聲，我先如夢初醒咁知道佢喺度玩野。
 
我即刻擰轉身：「笑咩呀笑？唔係你懶醒衝上樹，我使講啲咁嘅嘢？」中間省略咗好多情節，但呢個的確係事實。
 
小悠笑咗一陣先笑完：「知道喇，玩吓渣嘛。」
 
「…隻手仲有冇痛呀？」
 
「嗯…」
 
「咁行啦，同你去睇醫生。」
 
我求其扯開話題——理由係如果心入面唔係已經有珀奈嘅話，望住小悠頭先個笑容，我諗我真係有機會沉船。