【全劇終】《我喺街執咗個失憶嘅女仔返屋企》: 奇怪的心動感覺(上)

嘥咗唔少氣力，張廷宇個死仔先肯講自己喺邊，條友仔原來喺佢屋企附近個後山。得知呢一點之後我即刻帶埋小悠飛的士趕去。
 
「張廷宇！」我嚟到佢講嗰個位置，但半隻人影都唔見。
 
「張廷宇！」小悠有樣學樣，跟住一齊嗌。
 
「小悠，我地分頭搵吖。」為咗節省時間，我提議。
 
小悠「嗯！」咗聲，就行咗第二個方向。
 




個死仔唔係嚟真吓嘩…？我喺山坡望落去，睇吓會唔會有咩發現，好彩我擔心嘅嘢冇發生，我當堂鬆一口氣。
 
「張廷宇！你喺邊呀？」我用盡氣力大嗌，依然得唔到回應。
 
差啲想報警嗰陣，張廷宇終於開聲：「我喺度呀，你望上嚟啦。」
 
我岳高頭，發現張廷宇坐咗喺一棵樹上面。
 
「你搞咩呀？」
 




「我生無可戀，你唔好理我啦。」
 
「你咩事又生無可戀呀？Tiffany 飛咗你呀？」Tiffany 係佢暑假嗰陣溝到嘅隔離班一條女。
 
「仲話兄弟，你真係好了解我…Tiffany 已經變咗過去式好耐，我而家鍾意嘅係芝芝。」
 
「有鍾意嘅人咪幾好，幾青春吖，咩事咁睇唔開呀？」雖然唔知芝芝係乜水，但都係安慰張廷宇要緊。
 
「你唔明架喇！佢啱啱響ig出post，話要同我分手。」
 




「咁你咪由佢過去囉，下一個更好呀，唔使生無可戀吓嘩？」我用一副專家口吻講，儘管現實中我只係A0。
 
張廷宇個死仔不但止唔聽，仲正面抽擊：「你呢個A0毒撚識條春咩？除咗芝芝之外，我根本冇可能愛上第二個。」
 
「你唔試吓點知呀？」
 
「唔使試喇，因為我準備喺樹上結束我嘅一生。」講完之後佢扶住樹幹慢慢企咗起身。
 
「喂，你唔好呀！」
 
呢個時候，小悠終於搵到呢邊，我示意佢唔好出聲住，之後望一望棵樹。
 
我唔知佢接收到啲咩訊息，只係對我做咗個ok手勢，然後兜咗去樹後面。
 
樹上又傳嚟張廷宇把聲：「阿飯，來生再見，我要跳落嚟喇。」




 
已經分唔清佢係真心定假膠，畢竟跳樹呢個自殺方式真係聞所未聞，而且，我諗綁條繩吊頸嘅死亡率絕對高過喺呢棵兩米高嘅樹上面跳落嚟…
 
我拿拿聲行前一步，就算佢真係跳，我都應該接得住佢，至少可以做吓人肉消防墊。
 
「張廷宇！」唔係我把聲，更加唔係張廷宇嘅聲。
 
我望向聲音來源，原來小悠唔知幾時爬咗上樹上面。
 
張廷宇望一望小悠，然後對我講：「阿飯你係咪玩嘢？我失戀你帶埋條女嚟做乜撚嘢呀？」
 
鑑於形勢緊急，加上呢個本來就唔係事實，於是我再次同張廷宇解釋：「佢唔係我女朋友呀，上次唱K我咪講咗囉！」
 
「真係on9先會信你。」
 




「張廷宇，阿帆佢冇呃你呀，我真係唔係佢女朋友，但因為發生咗啲事，所以我而家住咗喺阿帆屋企。」
 
「屌你老母仲要同居？！」張廷宇對我大嗌。
 
「唔係呀，你地返落嚟先啦…」我嘆口氣講，同時思考緊如何令小悠唔好再火上加油。